《女人街再見了》劉心悠見證智叔演技感染　「一上鏡就有爆炸力」

由已故香港演員廖啟智（智叔）、吳卓羲、劉心悠主演的《女人街，再見了》今日舉行首映，二人接受《香港01》訪問，重提跟智叔合作的點滴，均表示在智叔身上獲益良多。

劉心悠先講到自己在戲中飾演搬運工人，親自搵一位搬運工人哥哥去學揸架唧車。「其實好搞笑覺得自己好似外星人，本身完全唔知點用，好在拍戲時啲箱係吉嘅，哈哈！」吳卓羲即時補充：「其實咁先係最難，你要扮有力啊！（劉︰你今次做古惑仔啵？）係啊，能夠拖住劉心悠去做古惑仔，你仲想點呢？我哋每日喺旺角女人街開工就係跑，跑街、跑樓梯、仲要上山。」

當提及智叔時，二人均表示難過及惋惜，吳卓羲：「他是我非常欣賞的演員，演技就唔使講，講得多就好似擦鞋，當然欣賞佢嘅專業、對劇本嘅了解、演繹嘅方法、好投入等等，非常值得我哋學習。雖然有排都未學得晒，但少咗一位咁專業同神級嘅演員，係好可惜。」

而劉心悠則回應：「智叔一向俾我感覺都係好溫文，一上鏡就好有爆炸力，最記得一場戲佢要教仔，本身位小演員唔使喊，但智叔在旁做戲時，竟然講到連佢都喊埋，連小演員都感受到佢嘅力量，可見感染力係好大，係天生嘅魅力。」