【星戰外傳】甄子丹整盲自己闖宇宙 打出Jedha派武術風格？
曾被評為本年度最令人期待之作《俠盜一號：星球大戰外傳》（Rogue One: A Star Wars Story）將在下月中上映，亞洲首輪宣傳率先在香港展開，成功殺出地球的「宇宙最強」甄子丹會見傳媒時，談及更多關於自己飾演雙目失明的武僧智刃嚴（Chirrut Îmwe）時的經歷。
星戰是時候找個中國人！
在訪談之間，有記者問甄子丹覺得《星戰外傳》邊個角色最打得？他半信半疑地回答：「我諗我係最打得㗎喇，因為其他都唔識打㗎嘛，或者深藏不露，識詠春我唔知啩。」及後言歸正傳，「你回想吓之前星戰嘅武打，好多都係中國武術嘅招式。」他續說：「據我理解，George Lucas創作星球大戰嗰陣，受咗好多東方文化、歷史及哲學影響，從故事內容去睇，呢點其實顯然易見，特別是原力呢個概念，就係與武術相連。所以，係時候搵個中國人喇！」
被問到作為首兩名華人加入《星戰》的感覺如何，甄子丹說：「作為一個香港演員，作為一個中國演員，當然好有成就感，與導演首次會面後，我就知道呢個角色嘅重要性。」顧慮到要離開家人出外工作，他起初有點拿不定主意，但抵不過機會難得的誘惑，「事後覺得好幸運，冇錯失良機。」「當知道作伴嘅係姜文，覺得更加好，因為我同佢合作過。」
自己整盲自己 用心感受原力
但要飾演一個雙目失明的武僧，算是自己武打生涯的一個挑戰嗎？「其實係我提議，當時睇過劇本之後，覺得不如令個角色變盲，咁樣做好特別，又出眾，而當你睇不到嘢，就更要用心去感受，可以同原力（The Force）扯上關係，呢個想法連導演Gareth Edwards都讚good idea。」
之不過，他說初時難以適應，「帶上特製嘅隱形眼鏡之後，我雖然睇得見，但係有啲模糊。比起原本仲難。當你完全睇唔見，身體自然進入狀態，但當你仍然睇到一啲，又要做失明嘅人，就好容易有錯覺。開頭幾個星期我都摸索緊，盡量適應如何喺漆黑環境中活動，去到片場roll機之前，我會合埋眼重拾嗰種感覺。」
打出Jedha派的武術風格
打功夫是身心合一的表達，點對點即時有反應，被問及有沒有把武學概念放入電影，甄子丹直言在無意之間總會滲透，「呢次星戰嘅台前幕後都對我嘅電影好熟悉，而且有一定尊重同欣賞，在現場嘅每一個take，特別係武打方面，都會同我哋去研究。」但他又說，「而喺我嘅電影世界嚟講，我大多數根據人物角色設計動作，葉問打詠春因為佢係詠春嘅一代宗師，導火線打MMA都符合角色設定。所以，即使內裡有我嘅影子，都會有迎合星戰精神嘅地方。」「我冇刻意去界定乜嘢門派，（若果你問我，我會話）Jedha門派。」
除了好打之外，甄子丹談到對角色智刃嚴的感覺，「正義、愛國、有原則、有義氣，好好打，同我有少少相似！」「一句講哂，他係一個俠士。唔只我的角色，其他人都係俠士。所以，戲名是俠盜一號嘛！」