《征途》羅仲謙操練42吋胸肌要禁慾？「我同老婆分隔兩地喎」
新冠肺炎影響全球電影行業大受重創，由陳德森執導，羅仲謙、韓國男團Super Junior-M前成員劉憲華Henry，以及何潤東等主演的奇幻動作電影《征途》，亦被逼放棄在戲院上映，轉在內地視頻網站愛奇藝播放，由Netflix做全球發行。
羅仲謙身形一向不錯又大隻，今次為了新作瘋狂操肌，睇見他在電影造型照的一身結實肌肉，效果相當震撼，背後下了不少苦功，拍攝時連太太楊怡都有叮囑他要小心啲。
《征途》由鄭保瑞監製、陳德森執導、動作指導董瑋聯手打造，取材自同名爆紅網遊，主要演員有曾是韓國男團Super Junior-M成員劉憲華Henry、羅仲謙和何潤東等。據知電影總投資額近3億人民幣，前後花了4年拍攝。
導演為了讓《征途》能原汁原味搬上大銀幕，特別對Henry及謙仔開出嚴格的要求，拍戲的3個月期間，必需保持最top fit的身體狀態。
謙仔爆肌照曝光 42吋胸肌超煞食
電影公司近日發布Henry及謙仔的爆肌照，各自擁有一大排朱古力、手臂背肌脹卜卜，淨係睇相都感受到他們背後付出了不少汗水力水。
羅仲謙接受《香港01》電話訪問表示拍緊《征途》時相當艱辛︰「每日拍攝完成，都會去健身院力量訓練，在當地有搵教練操，身體要維持喺同一個水平既狀態。」
點撃即睇謙仔及Henry爆肌照：
楊怡叮囑拍攝要小心啲 操肌使唔使禁慾？
謙仔透露每日操體能大概會用2-3小時，「主要係每組肌肉都會分別集中操練，操完之後會跑1個鐘頭跑步機，因為劇中有好多動作場面以及騎馬場面，所以喺香港有搵老師上堂學騎馬，而去到拍攝當地亦都有上堂，以及有動作既練訓。」
戲中有不少動作場面，謙仔表示只要能力許可他都希望自己親自上陣，「雖然如果去到好危險既動作會安排替身，但我都盡量親身上陣，開頭有少少緊張，但好快搵到個感覺，太太有叮囑要小心啲。
謙仔今次拍戲操得咁fit，被問到有些人操練要禁慾，謙仔就表示「拍攝時我在內地，太太在香港呀。」
謙仔：日日似喺火爐開工
拍攝期間Henry和謙仔每日在40度高溫下開工長達12小時，應付大量動作和特技鏡頭外，連放假都要持續接受武術、騎馬等特訓，所付出的體能，實在難以形容。謙仔亦表示「嗰時比較辛苦係每日40度高溫加上大量動作戲同埋吊威吔，因為佢最主要嗰套戲服係皮質地，每日都似喺火爐開工。」
每日收工後都不是真正的收工，Henry和謙仔又相約在健身中心見，進行密集的訓練，而飲食方面同樣要重視。據了解，日常要應付很多工作通告的Henry，在拍《征途》的日子，油鹽和最愛的飯麵全走，日日只以水煑雞胸和青菜醫肚。而一向身型都好大隻的羅仲謙，也有按照教練指示，少油少鹽。
連續多天每日要飲10公升水
「我同Henry都有露胸肌造型，所以除了力量鍛練，教練在改善缐條方面也會有特別安排，例如拍造型照之前，連續幾日要我飲10公升水，到影相當日就要勁食薯仔收水，等身體缐條更明顯。」經過一返操練，謙仔擴胸後呎吋係幾多？他就笑指：「當時沒有度，有42吋啩！」
仲要上堂學騎馬：「與牠傾偈培養感情」
收工密密操加上飲食的配合，Henry和謙仔爆肌效果超理想，手瓜、胸肌、格仔腹有齊，有缐條又不過份筋肉。繼之前拍《小Q》，謙仔花了幾個月時間接受導盲犬訓練員訓練和狗狗相處，今次拍《征途》，謙仔就要與過千磅的馬匹做對手。
在戲中親自上陣策騎的他，專登在香港上堂學騎馬。「雖然我唔識騎馬，在香港亦只是學了十幾堂，但基本概念和技巧已掌握到；其實同對狗狗一様，上馬前先和牠傾偈培養感情，練習時也不會跑太快以免危險，最重要是自己不要害怕，因為馬十分聰明，會感覺到你驚。」為爭取時間和合作馬匹相處，謙仔更加提早幾星期入組。