【三國殺幻】鄭伊健拉埋洪興手足打入三國　海報造型勁似《黑豹》

上海國際電影節開鑼，大量電影籌拍中，甚至已完成而你又未必聽過的電影，都趁呢個機會同大家見面。當中就發現有齣好嘢，對香港人來說應該好有興趣。事關電影取材自曾經在學界瘋玩，早前亦狂熱過一輪的手遊《三國殺》，而主演的更是半支古惑仔洪興成員，有鄭伊健、謝天華及林曉峰，有呢兩大理由你已經唔睇唔得，再加埋海報扮埋Marvel《黑豹》呢一點，真係三大理由你要期待呢套新作《三國殺．幻》。

這部奇幻之作《三國殺 · 幻》，是由內地的豐隆影業出品，主演有鄭伊健、謝天華、林曉峰三位洪興好兄弟，仲有好耐冇見的香港演員于榮光飾演歹角喬恩。女主角就有內地的賈青及逯子。電影關乎一個英雄門的組織，當中有兩件神秘錦囊牽涉一個驚人秘密，而當眾人在玩《三國殺》紙牌遊戲時，伊健就無意間進入了這個三國世界，繼而成為名將之一。

《三國殺》是紅遍中港台的紙牌遊戲，以三國時代為背景，可由2至10人同時進行，遊戲開始時先抽牌決定身份，當中有主公、忠臣、反賊、內奸四種，其餘還有武將牌、體力牌、錦囊牌、裝備牌等，以增加戰鬥力。從預告可見，伊健在遊戲中獲得三國殺力量後，可以輕易地避開子彈，隨後更擁有無限神力。至於另外兩位洪興兄弟，謝天華及林曉峰，從預告所見則未有變成三國名將，但就肯定是同一陣線，跟于榮光對決。

執導的呂柯憬是位80後，就讀於中央音樂學院，之前從事音樂創作，今次是首次當電影導演。在宣傳上，強調電影集科幻、奇情、動作、愛情於一身，而從預告可見，充斥著特技場面，看來是睇特技多過劇情的一部作品，暫未知香港會否上畫。