【逃亡大計2】黃曉明取代阿諾舒華辛力加？　孖史泰龍打戲連場

由史泰龍以及阿諾舒華辛力加主演嘅《逃亡大計》喺2013年上映，全球票房勁收10.7億，開續集本是意料中事，估唔到要等足五年。最近片商宣佈《逃亡大計2》將於6月28日於香港上映，劇情大綱及港版海報亦已出爐，逃獄專家史泰龍繼續留守，阿諾舒華辛力加嘅位置，換上《銀河守護隊》中飾演達拉斯（Drax）嘅Dave Bautista，以及海綿大哥黃曉明，宣傳片中睇到曉明嘅戲份仲相當重添﹗

上集講到逃獄專家史泰龍解破了重重機關成功逃脫，《逃亡大計2》再次歸隊，拍住《銀河守護隊》中飾演達拉斯（Drax）嘅大隻佬Dave Bautista，殺入高科技隱藏監獄－「黃泉」，拯救被脅持嘅入室弟子黃曉明。其實電影早喺去年已經拍攝完畢，當時史泰龍更親自於IG上載同黃曉明嘅合照，寫上：「與非常特別又有才華的演員黃曉明一起合作，跟他在《逃亡大計2》共渡了很棒的時光，他的拳頭可是又狠又快！」

的而且確，於預告片中見到海綿大哥出鏡率相當高，而且有好多武打場面。曉明一貫自信又計仔多多嘅眼神，面對數十個敵人依舊神態自若，原音講英語對白，兼武打戲親身上陣，霎眼間有點似《葉問2》中嘅情景，唔知曉明大哥一個打幾十個嘅場面有幾精彩呢？