【康城影展‧冷知識】評審日睇2部戲好易做？　每部戲4個鐘走唔甩

第71屆康城影展接近尾聲，大家開始關注獎項花落誰家。過去10多日，評審們都忙於睇戲、開會、去首映、開會……無時停。或者你會覺得，每年參選的作品不出20多部，有10幾日時間分，平均每日睇兩部戲，相當充裕吧！但其實當中有很多細節就要你勞心勞力。

以今年為例，展期由5月8日至19日，一共有12日，而參選正式競賽的電影就有21部，除開來算的確每日兩部都有找。不過據資深電影人麥聖希Gary解說，普通人睇部戲兩個鐘就真係兩個鐘，但以他們身份計，閒閒地都要預4、5個小時睇一部戲，到底時間花在哪裡？

事關身為評審，多數都要出席該片的首映禮或特別場，而首映前一小時就是行紅地氈時間，所以預早一小時到場是基本要求，還未計及出席前的裝身時間。Gary還資料提供︰「好多時電影放映後，觀眾會站立拍掌拍足10至15分鐘以表尊敬，而且隨後又會有After Party，所以睇一套戲要4小時不是誇張。」照咁計，一日睇到兩至三部都好頂盡。

除此之外，睇完戲還有最重要的工作，就是跟其他評審開會，決定評分及獎項誰屬。雖然開會的次數取決於主席的慣性，但兩、三日開一次都是基本消費。再者，身為評審，很多品牌活動都會邀請出席，又有很多電影人的活動或其他首映要賞面撐場，所以十多日的行程，時間都排得密密麻麻。只可以講一句，評審真係唔易做。