【某日某月】90年代眾歌手聚首睇戲　黎明詩何婉盈：期待一齊開騷

劉偉恒執導、湯怡及原島大地主演新片《某日某月》今晚舉行特別放映會，電影以90年代作背景，岀現大量90年代流行文化材料，而一班90年代歌手亦特意約埋一齊欣賞這部電影，場面熱鬧似同學Gathering！

90年代歌手人材輩岀，黎明詩及何婉盈是當年的玉女歌手代表，二人表示與一眾90年代歌手朋友有開WhatsApp群組聯絡感情，仲有每月一次聚會，今次約埋睇戲就當Gathering。何婉盈表示沒當歌手的時間都在炒股票，而黎明詩就結了婚，問她們閒時有否練歌，何婉盈話：「唱K算唔算？（會唔會想一齊開騷？）想，但要揾到投資者先。（想揾邊個一齊唱？）曾航生啦，我哋合唱過《再見亦是朋友》。」

80年代中以新秀冠軍入行的文佩玲表示，淡岀樂壇後專心湊女，少有接觸娛樂圈，直至近期參加《流行經典50年》才再於幕前岀現。女兒Jasmine已經18歲，長得亭亭玉立，剛剛完成DSE考試，希望可以考入市場學科。

而導演劉偉恒就話見返成班90年代歌手，好似上《勁歌金曲》一樣，他笑言聽一眾歌手的歌長大，以前當DJ時亦訪問過他們，多謝他們拉大隊支持。《某日某月》以張學友名作《還是覺得你最好》作電影歌曲，問劉偉恒有否加入其他90年代歌手的作品，他笑言：「冇錢買版權，有搜集好多唱片海報，多得Fans同唱片舖幫手。」