雪兒客串《貪狼》答謝古天樂葉偉信　難忘《爆裂刑警》苦練廣東話

《殺破狼‧貪狼》舉行金像獎慶功，慶祝電影在各大小頒獎禮上勇奪10個獎項，而有份客串做古天樂戲中太太的雪兒（Michelle）都有出席。
今次專程從新加坡返港客串一日戲份，Michelle坦言是要答謝當年導演葉偉信，找她拍人生第一部電影《爆裂刑警》，而拍攝時古天樂又處處關顧，所以今次一Call即到。

回想拍攝當日，雪兒只有一日戲份，在演甚麼都沒有細問下便立即答應。「自己沒想太多，導演說套戲只需要我拍這一段，便立即開工，拍攝時亦不太清楚整個故事會怎樣發展，劇本怎樣便拍沒細想。」這麼信任劇組，因這班都是20年前，雪兒初來香港已合作的班底。

「我當時不懂廣東話，都邊拍邊學，在《爆裂刑警》入面，有場戲要我講段好長的對白，我好擔心，鎮宇就好好人咁教我用動作去加強記憶，例如行到去這個位罝便講一句，行到梳化坐低就講第二句，拎起件東西就講第三句，這樣記真係入腦好多，結果不用好多take便拍完。」到後來拍《尋秦記》，古天樂也從旁助她背對白。「因為好多古文，好難記，古仔好好幫我將對白精簡，變得較易讀出來。」

不過數到入行最難講的一句對白，就要講到入行做模特兒，跟郭富城拍第一個One2Free廣告。「當時更加一對廣東話都唔識，導演只需要我講一句︰『我哋會唔會好似煙花咁呢？』但就一直講得不好，咬字、音準、節奏都錯，要身邊人不斷提我，佢講一句我講一句，好似學唱歌一樣。」最終都順利拍成，不過雪兒就到今時今日都記得呢句對白，可見那句對白對她的折磨難以忘懷。