【全境封鎖】落實開拍真人電影　《死侍2》導演暫定2019年開工

《死侍 2》（Deadpool 2）套戲5月17日先上，雖然未知反應，但單睇頭兩條突破框框的預告，已非常對味，好頂癮！大家都深信導演大衛雷奇（David Leitch）可以為Deadpool再添一份神彩。
觀眾都覺得正，老闆就更加睇中佢，已經搵定佢再開工，不過唔係《死侍》第三集，而係遊戲生產商Ubisoft的作品《全境封鎖》（The Division）真人電影版，並將會由《斷背山》男主角積佳蘭賀（Jake Gyllenhaal）主演。以及潔西卡雀絲坦主演。

其實電影早在2016年已經傳過會開拍，當時更已經盛傳男主角係積佳蘭賀，估唔到今日公布演員名單時真係有佢。至於導演方面，曾經講過係《毒網》編劇史蒂芬加漢（Stephen Gaghan），但較早前佢已經宣布退出，而家由大衛雷奇頂上，都算唔錯的選擇。

雖然導演名同卡士都有齊，不過《全境封鎖》都未解封得住，因為導演今時唔同往日，自不記名執導《殺神John Wick》後，已大獲電影公司賞識。忙完《死侍2》宣傳之後，今年秋季就要同狄維莊遜（Dwayne Johnson）及積遜史達頓（Jason Statham）合作，投入《速度與激情》（Fast and Furious）外傳工作，所以呢部新作最快都要出年先可以解封，全面開工。電影更會與Unisoft Motion Pictures製作。

電影未開拍已備受關注，事關該片是根據Ubisoft 的暢銷電玩遊戲改編。按遊戲情節，劇情講到某年的黑色星期五購物節後，美國爆發了一場透過銀紙傅播開去的大規模病毒感染，奪去全球100萬人的性命。與此同時，一支秘密運作的特工部隊「The Division」現身，成為人類存亡的最終防線，並致力調查病毒源頭，為人類帶來僅餘的希望。這個第三人稱的射擊遊戲，可作單人或多人參與，於 2016 年 3 月推出後，累積玩家數量已突破2,000 萬人，而遊戲的續集也將於今年 6 月的 E3 展上曝光！