【邊個出差咁黑仔？】查理絲花朗做衰老闆 打工仔黑到盡頭有得救
撰文：施玲玲
出版：更新：
辦公室政治搞唔掂，返工只想獨善其身，點知老實人注定畀人恰！金像影后查理絲花朗（Charlize Theron）監製最新爆笑動作喜劇《邊個出差咁黑仔？》（Gringo）完美示範，就算自問是腳踏實地的普通打工仔，黑起上嚟都可以好攞命。
《邊個出差咁黑仔？》講述賤精腦細陸七同女魔頭拍檔易拎，老點戇直下屬哈奴出差去墨西哥，話就話跟進藥廠運作，其實質是叫停藥廠跟毒梟之間的交易，執靚盤數準備賣盤。被蒙在鼓裡的哈奴到埗後才驚覺自己即將失業，搵老婆呻下又發現對方外遇，事業愛情兩失意，於是豁出去扮到被綁架質行屈返公司一筆，點知不止得罪大毒梟，更慘遭僱傭兵追殺，死到臨頭，到底哈奴可以點逆轉命數，做返次人生勝利組？
電影由荷里活資深特技演員拿殊艾格頓（Nash Edgerton）執導，他曾在《廿二世紀殺人網絡》、《狼人：武士激戰》等作品擔任替身，保證交出抵死幽默的精彩動作場面，男主角則是曾憑《馬丁路德金──夢想之路》獲金球獎影帝提名的英國演員David Oyelowo，首次參演黑色喜劇的他，夥拍身兼監製的查莉絲花朗，還有導演親生細佬《紅雀特工》的祖艾格頓、《賤熊2》女星雅曼達施菲和《黑魔后：沉睡魔咒》沙杜高柏等，配搭相當新鮮。