【大樂師】何華超舞者到演員非僥倖 「個個都想做下一個郭富城」
提起何華超這個名字，大家未必會有印象他是誰。但如果說起早年紅極一時的《3D肉蒲團之極樂寶鑑》的「寧王」，大家就會記得他。由1998年起，何華超原來已拍了超過80套電影，但多半以甘草姿態出現。而他最新的電影《大樂師．為愛配樂》已經上映，在戲中他展現了大家未必熟悉的一面，就係跳舞！
原來何華超在正式入行做演員前是一名舞蹈員，自言有「過度活躍症」的他笑言跳舞與演戲都可以助他抒發多餘的精力，近年甚至愛上耕田，而從舞蹈員到演員的路上，有一位已故巨星對他有很大影響。「以前羅文先生教我表演者一定要自戀，一定要好愛自己先可以做到好嘅表演。而只要做到喜歡嘅表演，我唔介意冇錢。」這句說話出自一個會親自務農的演員口中，頗有說服力。而說到華超今年其中一件憾事就是因風災，令他自家的蘿蔔失收而無法送給劉偉強導演。
《雪狼湖》給他轉型機會
其實過去也有不少演員是由舞蹈員轉去做演員或歌手，其中的俵俵者一定是四大天王之一的郭富城，是否有很多舞蹈員都以他為目標，發著一個明星夢呢？「的確好多人幻想自己好似郭富城咁，由dancer變成明星，但通常有呢種幻想都係做唔到。有時得失心太重反而容易失落機會。不過做dancer的確好多機會，見你靚仔靚女可能搵你拍吓廣告或者拍一啲電視、電影次要角色，甚至試音做歌星。機會好多，睇你把唔把握到。」
而華超就是其中一個可以捉住機會的人。當年陳果開拍《去年煙花特別多》，因為何華超演出了《雪狼湖》的音樂劇演出，輾轉下被陳果看到其場刊，而獲得了試鏡機會。作為一個舞蹈員，可以跳到《雪狼湖》已經夠興奮，從仲仲得到個轉型機會，的確叫人羨慕。「當時陳果覺得呢個鬍鬚佬幾得意，叫我去試鏡。結果傾傾吓就揀咗我，阿果可以話我係恩人。」咁計，其實張學友都算係佢半個恩人。
第一次以演員身份喺銀幕上跳舞
雖然拍了很多戲，但不是很多戲都可以有歌舞元素在電影中，所以今次在《大樂師．為愛配樂》可以有機會來一個「Dancing in the rain」，華超表示特別開心，讓他可以在一個演出中結合兩個自己的專業表演形式：「今次係真正第一次以一個演員喺銀幕上跳舞，而戲入面我跳嘅部分就係我自己排。拍攝當日突然落雨，我就諗不如玩吓遮，就咁跳好似差咁啲嘢，出嚟效果又幾好，更有意境！」可以在電影中以自己的跳舞專長演出，華超完全展現何謂駕輕就熟。而那幕Dancing in the rain，亦成為《大樂師》其中一個令人留下深刻印象的畫面。
港產片的困局 一定要考量內地市場
近日成龍對港產片的看法引來大家議論紛紛，踫巧訪問當天也與華超談起這個問題，他也表示這是一個困局，但不是因為題材，而是資金：「作為香港演員對港產片一定有情義結，我哋香港電影人坐埋一齊成日傾呢個話題，大家都想唔理內地市場，但最終搵投資方時始終要低頭。其實你數得出每年港產片有幾多，大部分都係合拍片。近幾年港產片都偏向講政治，但呢種戲好難成為潮流。又好似《大樂師》呢類輕喜劇，香港觀眾好少接觸，但其實可以話佢係一個清泉。以後港產片嘅路向其實仲探索緊。」如果大家想證明成龍的話說是錯的，就更要入場支持港產片！特別是《大樂師．為愛配樂》，票房是最能反映現實，面對票房不足，排片量下降的問題，大家又願意花數十元支持它，告訴成龍港產片有自己的市場與價值嗎？