【以你的名字呼喚我】專訪男男戀情侶：公認術語只有性愛體位1069

以一段忘年同志戀為故事主線的《以你的名字呼喚我》（Call Me By Your Name），被喻為近代最優雅動人的同志電影，戲中一對戀人Eilo與Oliver愛得轟烈，看得人疼心。不過現實裡，很多人都對男男戀都抱持偏見，總離不開濫交、愛滋病等與性相關的負面看法……事實是，真愛並不止於異性戀，男couple都可以有性又有愛，今次受訪的Milton和Matt就是其中之一。
攝影：江智騫

不少人大讚《以你的名字呼喚我》拍得得出色，多少都因為戲中沒有將性行為情節拍得過份露骨，而且還加入許多同志的象徵物件如蜜桃等。「其實同志圈入面冇咩特別有隱喻嘅物件，好多人會用蜜桃隱喻同志，其實可能係因為大家覺得似臀部，咁同志性行為係肛交，蜜桃形狀好自然令人聯想到囉。」Matt說。戲中除了以蜜桃作隱喻之外，早在放映傳媒場時，電影發行商亦有派發潤膚膏，我問：「係咪有隱喻？」Matt說：「車，用潤膚膏咁我不如用BB油，潤膚膏有香料又有防腐劑！點用啊！」

男同志戀人Milton和Matt在訪問期間，不時會拖手搭肩，Matt顯然比較man，Milton則較陰柔，兩人拍拖只有三個多月，「我哋喺交友App識，本地好多男同志都係透過交友App認識，好多年輕一輩嘅同志會用。但係幾乎所有人都唔會用自己相做頭像，大部分都係用自己重要部位，又或者用爆肌肌肉照，「呢類App其實好多人都當係約炮途徑，好多人一聊人傾偈已經單刀直入。」

點擊放大圖片：

【以你的名字呼喚我】Armie拍同志床戲夠自然：我們只是沒穿衣服

Milton笑言：「我用自己照片做個人頭像，好多人都同我say hi，好多人睇相就知對方係咪適合自己，如果我係男性化嘅1號仔，咁我見到人擺爆肌相就唔會聊佢，同埋，好多人喺gay吧識人抑或喺交友App識人，第一句都會問對方身高體重，同埋問『你下體幾長？』另外仲會問你係1號定0號？圈內人俗稱撞number。」Matt指，雖然他不會以這類開場白識男友，不過本地同志圈裡的確很多人如此，「我哋都見怪不怪啦，好似係一種共識咁，咁又無可否認，好多同志都好鹹濕，不過唔好以為男同志就會忍唔住當街打野戰，至少我好少聽聞。」

Matt和Milton形容，的確許多男同志都鍾情肌肉男，「其實都好正常，好似男女戀咁，女方喜歡男友夠man，男方想女友溫柔，咁男男戀，總有男女角色，即係1號同0號嘅分別，簡單去分就係性行為上嘅角色，1號係進入嗰個，0號自然係被進入嗰個，其實男男戀唔一定會分邊個男邊個女，但0號總會想有個比自己更男性化嘅男友，所以特別鍾情肌肉男。」

除了0號1號之外，其實男同志圈有不少術語，例如跟性愛相關的「1069」，「呢個就好明顯係性交體位，即係肛交同互相口交嘅合稱，不過其實圈子內唔係咁多術語，好多都係非同志嘅人自己作，例如咩熊族、猴、狼之類，其實都係圈外人自己將同志外型分類，同志圈從來冇認同過，某程度上都幾唔尊重。」除了用作形容的莫名字眼之外，Matt更指其他無謂暱稱更是流於嘲笑，「好似咩萬能插蘇、USB之類，其實唔係每個同志都對性咁開放，同志圈固然有人為性而識另一半，但仍然有人係真心想談戀愛。」