【與神同行】朱智勛想投胎做隻禿鷲？　金香起最愛花名「金臭味」

《與神同行》行到今日走勢依然凌厲，一眾演員的宣傳工作更加冇停過。今日電影公司便發布朱智勛同金香起解答香港觀眾的提問，當中問題非常有趣，兩位亦答得好搞笑。

朱智勛唔覺意劇透了

街坊問到朱智勛在《與神同行》中，講到自己好想投胎做富二代，咁如果有得揀，自己又想做咩呢？諗了良久，最終答案竟然係……「我想做禿鷲，因為能夠飛好遠。」答案風趣得好難以捉摸。

然後街坊再問如果二揀一，朱智勛會想要戲中河正宇的聰明腦袋，還是第二集出場，飾演成造神的馬東石那種大隻？朱智勛二話不說︰「聰明頭腦好一點，可以學買股票賺錢。」隨後更唔覺意劇透埋︰「下集成造神（馬東石）都會講類似的對白。」似乎下集入面，馬東石似係會飾演一個有勇冇謀的角色？

金香起想過做空姐

少女們總是多幻想，特別講到我的志願，更加係三心兩意。街坊問到金香起小時有咩夢想，結果一數就數唔停。「畫家啦、Food Stylist啦、麵包師傅啦，因為我鍾意做麵包，空中小姐都有諗過，可惜我唔夠高。」

向來一臉正經的河正宇，原來在片場不時同金香起開玩笑，尤其幫佢改花名，咁當事人又最鍾意邊個花名呢？「金氣味（編按︰氣味同臭味的韓文讀音近似，故似金臭味），因為小學時已經聽到這個花名，好親切。」