【出爐影后】周秀娜擊敗惠英紅張艾嘉 奪「高登電影獎」女主角獎
撰文：洪曉璇
出版：更新：
2006年以模特兒身份入行，原來周秀娜已經入行超過11年，娜姐絕對可以話係轉型最成功嘅𡃁模。近年全力進軍影壇，拍住周星馳拍《西遊．降魔篇》榮陞億萬票房女星，2017年喺《29+1》嘅表現更令人眼前一亮，被外界認為係金馬獎最大遺珠，呢日終於得到獎項肯定！由台灣影評人舉辦的《2017第六屆高登電影獎》（華語電影） 公布賽果，周秀娜壓倒勁敵《血觀音》的惠英紅和《相愛相親》 的張艾嘉等，贏得「華語電影最佳女主角」。
「高登電影獎」由台灣影評人評選，已經舉行到第6屆，剛公布2017年《29+1》獲選為「華語電影最佳改編劇本」（彭秀慧），周秀娜更壓倒兩大影后惠英紅及張艾嘉，贏得「華語電影最佳女主角」。得知消息後娜姐表示：「自己沒諗過會贏得最佳女角，當然感到開心，覺得係大家給予片中『林若君』呢個角色嘅肯定同鼓勵。加入影壇10年後，能夠遇上『林若君』覺好幸運。」
之前未能入圍台灣金馬獎，被外界封為最大遺珠，嚟緊香港電影金像獎，周秀娜又有無信心呢？「 點樣都要俾自己信心嘅，如果《29+1》到時有其他入圍名單，好似導演、編劇等等任何一項入到圍，我都會好開心。之前一路有諗過換車， 但一路冇做到，如果真係入圍金像獎， 就換新車當係俾自己一個鼓勵。」
+2