姜皓文入行32年終於開齋　獲頒國際電影人年展最佳男配角獎

恭喜，恭喜，從影32年的姜皓文(黑仔)，在演藝生涯上終於開齋，憑《拆彈專家》獲「第一屆馬來西亞國際電影人年展」頒發最佳男配角奬項。黑仔獲知得獎一刻，更第一時間攬實太太，之後仲話會跟太太食盡吉隆坡慶祝，感謝太太陪住他一齊分享這份喜悅，黑仔演技出色外，更是名副其實的愛妻號。

黑仔似乎跟馬來西亞特別有緣，剛剛在馬來西亞慶祝完生日結婚周年，又在當地置業，更在當地贏得男配角獎，黑仔心情興奮地說：「今次攞奬真係同大馬好有緣份，自己外公係馬來西亞人，外婆係馬來西亞華僑，如果得嘅話，真係光宗耀祖。呢個都係我第一個電影嘅獎項，好感恩。希望有一個好開始。」除了黑仔贏得男配角，電影《拆彈專家》亦獲頒最佳剪接奬，絕對為港人爭光。

至於頒獎禮的女配角獎，則由何超儀憑《無限春光27》奪得，超儀更在台上多謝導演，其後接受媒體訪問表示，電影意識相當大膽，還說雖然演出妓女角色，但就非常有意義，而且她說不介意演妓女，亦不會是她最後一次飾演妓女，更話如果有機會到荷里活發展，也會接受這類型角色。黑仔和超儀兩位演員有獎外，《功夫瑜伽》的導演唐季禮亦憑該片贏得最佳導演，而且該片亦贏得最佳電影動作獎，可說是實至名歸。