【真．三國無雙】招積張建聲正式入組　為角色增肥15磅演出再突破

網劇《反黑》昨晚已播出大結局，追足30集的觀眾終於可以抖抖。要數劇集最大得益者，一定非張建聲莫屬，他飾演招積一角，縱使有一眾老戲骨較量，但都能突圍而出，相當厲害。
做觀眾的可以抖抖，但張建聲就未有得抖住，據消息指，原來導演周顯揚亦睇中張建聲的演出，早就徵召他入伍，加盟《真．三國無雙》劇組演一角，仲要係主角之一張飛，而且為令自己更具霸氣，張建聲不惜再度為角色增肥，今次少少地增肥15磅，就係要演出神髓。

電影《真 ‧ 三國無雙》現正在寧波拍攝中，雖然電影有蕭定一的數碼中國參與投資，但因為合作坊還有中國和日本兩地，所以電影的所有細節都一直保密，至今連一個完整的演員及角色名單都未有流出。不過今日收到消息，據早前證實古天樂、劉嘉玲、韓庚、王凱已入組後，最新指張建聲亦早已埋位拍攝，而他演的正是桃園結義三兄弟之一的張飛，其餘兩兄弟分別是楊祐寧飾演劉備、韓庚飾演關羽。至於劉嘉玲將會飾演鑄劍堡堡主，古天樂飾呂布，最神似的可能係林雪會演董卓，這個陣容極具吸引力。

由於保密關係，張建聲一直只能默默增肥，直至今日終於可以開腔回應︰「呢排好多人問我係咪發福咗？話點解我脹咗咁多？其實我係參與緊電影《真 ‧ 三國無雙》，飾演張飛呢個角色。起初係我老闆蕭定一俾咗三個月時間我去健身，要由普通身形操到變型俠醫嗰隻，本來我都操到七七八八，但到試造型嗰陣，先發覺想還原張飛喺遊戲機入面嘅真實造型，如果要拍遊戲 game 嘅真人版，就要令觀眾有代入感。」為還原度更高，Justins已經特登着咗件特技衫，令自己肥少少，但出來效果都係爭少少，所以我最後決定增肥。

今次是張建聲繼《壹獄壹世界》增肥演阿積後，再投入增肥行列。剛好，早前記者訪問張建聲時，已發現他的確發福不少，原來是為新角色做準備。電影完成寧波場口後，會全團出發紐西蘭拍大型外景，看來招積今年都有排忙。