新垣結衣《乒乓情人夢》邀請《稻中乒團》作者古谷實出山做宣傳
日本「國民老婆」新垣結衣主演電影《乒乓情人夢》10月尾就上映，而香港更緊貼於11月初就有得睇，實在是粉絲之福。結衣BB有幾紅相信都沒必要多講，但大家又有否想過，她會和已經完結了達20年的經期搞笑漫畫《去吧！稻中乒團》扯上關係呢？
《乒乓情人夢》（ミックス。）除有在日劇《Code Blue》（港譯：緊急救命3）中呼風喚雨的「逃恥女神」新垣結衣外，更集合了瑛太、蒼井優、廣末涼子、瀨戶康史同女新星永野芽郁等，陣容強勁。片商宣傳更非常有計，最新動作就找來著名漫畫家古谷實（古谷実），以他筆下殿堂作品《去吧！稻中乒團》為藍本，畫了一張電影海報，風趣程度爆燈！戲中成班演員一齊打乒乓，見到結衣BB身水身汗努力奮鬥個樣，仲要同「麻甩仔」瑛太調情，粉絲真係睇到拳頭都硬，未上映已經引起話題熱潮。
《去吧！稻中乒團》（行け！稲中卓球部）於1996年完結，不知不覺已經超過20年，無論漫畫定動畫都大受歡迎，好多人都睇過，但更多人誤會作品名是「稻中兵團」，其實正確是「乒團」才對。因為此作雖然離經叛道、色情又好笑，極盡惡搞之能事，但主線故事卻是講青春熱血的中學乒乓球，所以同今次結衣BB的《乒乓情人夢》合作做宣傳，都十分適合。而令大家驚喜的，是沒想過20年後古谷實還肯動筆畫《稻中乒團》，連他自己都說真是久違了。稻中版海報跟足原裝電影海報，兩名主角穿上球隊波衫，結衣BB化身第一主角前野，至於瑛太則變成擁有「矢吹丈」髮型的井澤，連背景的其他演員都畫了出來，令人一睇就發笑。
結衣同瑛太就對古谷大師出手助陣表示非常感激，女神話好多謝對方，這是一個很貴重而又快樂的打氣方式，希望各位《稻中乒團》的粉絲都會去睇這部電影。而瑛太就風趣地指，不知道為何自己會變了井澤，但都好樂在其中。
《去吧！稻中乒團》經典重溫：
失意男女打乒乓
電影講述從小接受母親地獄式訓練，人稱「天才乒乓少女」的多滿子（新垣結衣飾），在母親過世後就放棄了打乒乓，更遇上了負心漢，事業愛情都失意的她傷心回鄉，卻在瀕臨執笠的乒乓球會，遇上因傷退出拳壇的荻原（瑛太飾），原來他也被老婆拋棄流落到這鄕下地方，二人為了重新做人，組成了混雙打乒乓球，更準備出戰全日本大賽……
電影中一班演員，包括結衣、瑛太同廣末涼子，為了拍得更逼真，還特意跟日本的乒乓球手學打波，無論動作同速度感都做足真實比賽，各位入場時不妨加多兩錢肉緊，欣賞結衣特訓成果。
點圖放大：