【午夜場】《雷洛傳II︰父子情仇》劉德華化老妝演郭富城老竇　

難得兩大天王聚頭，今日睇呢套《雷洛傳II》都算經典。兩位飾演父子，劉德華場場都要化老妝，講句說話都慢番少少，雖然就唔算好神似，但都誠意十足。
不過呢集最好睇係兩父子，個阿爸貪污貪到全面系統化，但個仔就考入廉政公署，一個絕對的對立面已經令戲味更濃。

故事第一個精彩位，係佢跟顏同一齊爭個油麻地探長呢個油水位，最後由顏同奪得，原以為又輸一仗，但原來一哥有新指令，話要增設一個總華探長職位，由雷洛坐上，結果又係騎住顏同。然後自雷洛上任後，重整偏門秩序，各大撈家爭相擁戴，聲勢如日中天；相反顏同則一落千丈，令他對雷洛更加痛恨。

另一賣點係雷洛前妻阿霞（邱淑貞）來港，仲帶住個仔陪佢。不過遇著香港要廢除一夫多妻制，阿霞唔想影響老公仕途，選擇帶住個仔去澳洲生活，然後當阿仔長大成人後，就回到香港考廉政公署，呢個就係郭富城飾演的雷仲賢。兩父子不咬弦就緊，但最感人一幕係阿媽臨死，兩父子冰釋前嫌，臨終前做場好戲俾老婆睇，然後仲一齊殺敵。呢幕輪椅槍戰都算拍得緊湊，最神奇係兩父子可以槍林彈雨下都冇中槍，好運到一個點。