【專訪．西謊極落】「好立克」爆肌男周祉君 全裸打阿Bob唔怕醜
近日電影《西謊極落：太爆．太子．太空艙》的一條預告片，在facebook好多人分享大讚好笑，事關片中杜小喬被阿Bob（林盛斌）飾演的賊仔打劫，在她驚呼「強姦」之際，有猛男現身英雄救美，一拳打到阿Bob彈起，隨即畫面轉到回憶中的監獄，浴室內猛男全身赤裸以一對四，正當阿Bob想抽水時又被贈上迎面一拳，嚇到跪低塊面仲貼正對方重要部位，醒目Bob即時投降仲同佢稱兄道弟，過程搞笑。大家都對這位大騷肌肉又演得十分肉緊的猛男好有興趣，他的名字叫做周祉君。
在幾年前一個好立克廣告中，由頹爆廢青變醒神靚仔的周祉君（Aaron），由2012年開始拍戲，時間唔算長但參演作品都頗多，由《爛賭夫VS爛賭妻》、《掃毒》、《風暴》、《踏血尋梅》、《殺破狼2》、《壹獄壹世界》、《老笠》到現在的《西謊極落：太爆．太子．太空艙》等，幾乎近年的話題港產片都有份，雖然是閒角或路人，不過熱愛演戲的周祉君就非常樂在其中。「自細就對做戲好有興趣，入得到行做什麼都開心，就算做臨記行行企企，我都會研究如何可以行得有feel，我都樂於循序漸進，沒有期望過一出來就做天王巨星。」
聽到Aaron咁講，相信大家對他這份熱誠已不需懷疑，但另一個重點，這身強勁肌肉又是如何練成？原來都是源於一個半搞笑式的決定。「正式做演員前，我報讀了政府推行的『香港電影專業培訓計劃』，一直以來我都着眼於演技、表情之類的範疇，當時看見課程中有動作演員一項，心想不如試下，反正都不知要做什麼，怎料原來動作演員的課堂就是操體能，熱身都要做100下掌上壓，操半日到中午食飯時都食唔落，然後下午就練習刀劍、功夫招式等，一星期5日每日8小時……」Aaron以「好金」來形容當時的練習，難怪他能擁有一身爆肌。但辛苦卻能換到機會，在課程差不多完結時，他獲得了首次做特約演員的offer，參演杜汶澤的《爛賭夫VS爛賭妻》，其後他比較多是幫人做替身，真正多動作戲份是劉德華主演的《風暴》。「不過正片時都剪走了，哈哈。」他憶述當時有一個中槍倒地的鏡頭，起身跌落地重複了十幾次，最後出到來只有倒地那一刻的零點幾秒。「可以見個樣清清楚楚，已經好開心。」
點圖放大：
有機會就去到盡
做閒角都咁用心，何況做有對白的要角？周祉君今次於《西謊極落：太爆．太子．太空艙》飾演一個被屈入獄的強姦犯，照慣例衰強姦在獄中會被歧視欺凌，預告片中的一場戲，正是Aaron開鏡拍的第一幕，一上場就全裸同人大打出手，事實證明他已豁出去了。拍這場戲連阿Bob都話辛苦：「因為現場好熱大家的汗都是真，周祉君又打又喊又好激動，拍這一幕要用好多力量，他著住肉色T-back打底，其實好性感，片中他的重要部位差少少掂到我塊臉，這是用喜劇效果交代鏡頭，他完全不怕辛苦。」
聽到阿Bob大讚自己夠專業，Aaron高興之餘再強調一點：「我最後連條T-back都脫掉了！」原來這場戲要一鏡過直落地打，拍了兩次後，導演覺得不太到位問他「你怕不怕醜？」Aaron立即答不怕，然後便連打底褲都脫掉再來，真正全裸打得更放。「其實在拍了頭兩take後我已經喘氣，不過導演要求我有責任做好，第一次全裸拍戲其實心情幾舒暢，最後拍多了3 take，導演說OK，我已經頭暈眼花。」Aaron說做演員不能對唔住個角色，當劇本交到手就全力去演活他。「如果我演得好，角色自然會有存在感，所以每次都有咁盡去咁盡。」他最怕被人說這個角色可有可無，感覺似是自己把角色抹殺掉會好唔開心，這也正是他能豁出去的動力。