【午夜場】《海底奇兵》千里尋子　最強父親Marlin：唉唔駛驚﹗

何謂「最強父親」，單睇字面，當然是解力大無窮，非常強壯嗰隻老豆，但內心強大，無懼挑戰都是一個好爸爸，就似《海底奇兵》的主角小丑魚Marlin，身形雖小，但憑住「唉唔駛驚」的正面心態，決定穿越大洋洲，嘗試從「魚海茫茫」的大海找尋失蹤兒子。

時下很多兒童都被稱呼為「港孩」，主要特徵是他們無乜禮貌，嬌生慣養，生活安逸，確實作為父母的，當然想將最好的全都奉獻給自己孩子，不過過份保護會換來反效果，例如《海底奇兵》入面的Marlin和Nemo這對父子。Nemo可謂天生殘疾，右鰭生得特別細小，影響游泳能力，加上自小喪母，故作為父親的Marlin特別保護囝囝，可惜物極必反，搞到阿囝決定賭氣游出大海，豈料不幸被潛水員所捉，Marlin護子心切，決定聯同患有健忘症的Dory穿越汪洋大海，千里尋子。《海》片2003年上畫時轟動全球，觀眾除了被彼思製作的畫面震懾之外，劇本驚險刺激，好多幕都令人難忘，包括Dory 跟Marlin遇到奉行素食主義的鯊魚，卻意外激起其中一隻嗜血本性，過程驚險搞笑，然後Nemo又差點被生性凶殘的小女孩收養，當然不得不提最後一幕大逃亡，父子難得重聚，偏偏Nemo決心要救Dory，令到一向對仔仔過份保護的Marlin終明白到孩子要有足夠自由，才能茁壯成長。

故仔好老土，但拍得好睇精彩，說教得來無論父母定小朋友都易於入口明白。其實每個小朋友都希望快點變做大人，可以脫離父母照顧，不過人大咗，才知有家孩子是個寶，換轉今日若果輪到我做父母，可能同樣都是「錫仔錫到燶」，需知道現今香港環境，不是你主動想做怪獸父母，只是你不變怪獸，社會都可能迫你做怪獸。