【午夜場】《舊年暑假搞乜鬼》 典型驚悚片公式「青春性感血腥」
午夜場今周推介仲夏電影，壓軸出場當然要放部經典大作。此套電影當年全球票房高收1億2千萬美金，更有份牽起荷里活90年代末至千禧年的「驚悚熱潮」，片名更擺明話畀你聽，它是一部夏天電影。正是20年前的作品《舊年暑假搞乜鬼》（I know what you did last summer）！
1996年上畫的《奪命狂呼》，成功於90年代復興荷里活驚悚電影，亦開拓一條驚悚片公式：「青春+性感+血腥」。承接住《奪》片，有1997年上畫的《舊年暑假搞乜鬼》，故事套路都跟《奪》有七成似。故事講述兩對準備高中畢業的年青男女，各自滿懷理想，有人夢想做作家、有人想當明星，為紀念即將逝去的青春，決定去到海邊小鎮來個瘋狂度假，不過其中一位一時飲大咗，搞到男主角未能專心揸車，結果喺一條公路上撞死一名途人。四人一諗起東窗事發後，甚麽夢想、甚麽美好生活都會化為烏有，就決定棄屍大海。一年過後，四位主角各自擁有新生活，點知有日齊齊收到封信，裏面寫住”I know what you did last summer”（我知你上年暑假搞乜鬼），隨後有個殺手送上門，誓要剷除四位主角……
所謂驚悚片的公式，此套電影可說完美示範。先是主角一定青春的靚仔靚女，而先行遇害的，好似都離不開這類型角色，例如囂張跋扈的富二代，肌肉發達頭腦簡單的大隻仔，有靚樣但無common sense的美國甜心，至於女主角，就肩負戲中的性感場面，（兼多數是結局的「死剩種」，不然哪有第二集？）她們需於電影中濕身逃命加背心疾走，有時更送埋床上戲大酒鹽花，當然這名女演員必需要身材姣好，擁有漂亮臉蛋，而《暑》片的Jennifer Love Hewitt就是最好人辦，當年Jennifer有「荷里活朱茵」美名，她憑此片走紅後，仲被成龍大哥選中在《特務踢死兔》中做拍檔。
而公式中最後一環，就是嗜血凶殘的Final Boss，他（或他們）最鍾意失驚無神殺死你，死者遇害方式更係估你唔到，總之有咁慘死咁慘，有咁血腥得咁血腥，而他們的犯案動機都是離不開幫人報復。Final Boss亦會被安排一個重要標誌，《奪》片有鬼樣面具，《暑》片都有個銀色鐵鈎，而最後來到結局，就是你以為他已經死咗，但都只不過是煙幕，梗有條伏線留喺度，唔係電影公司點開下一集？
《舊年暑假搞乜鬼》當年全球大賣，期後更推出了兩部續集《舊年暑假仲有鬼》、《舊年暑假再3有鬼》，當然這條恐怖片公式咁成功，同類電影亦雨後春筍般出現，較出名有《搞乜鬼奪命雜作》系列、《死神來了》系列等，拍極都有，真係「死唔斷戲」。