【午夜場】《這個夏天有異性》個個都拍拖 又真係個個都想拍拖喎
撰文：許育民
出版：更新：
為暑期檔，找一堆青春偶像拍一套青春電影，今天聽起來是倒錢落海的行徑，但其實在Twins出道的那年頭，都仍然是最吸票房的舉動。
2002年，馬偉豪便結集了一眾青春偶像Twins、Shine與周永恆擔正做主角，拍出一部《這個夏天有異性》。演技青澀橋段嘻嘻哈哈，但今天重溫又覺得不過不失，相當精神。更精神是當日票房都可以大收960幾萬，真係既精神又醒神。
拍得青春片，就一定要有情愛橋段做主打。故事以Twins兩個女仔在夏天，各自經歷的一場戀愛。阿Sa蔡卓妍少女懷春，愛上籃球隊隊長徐天佑，而阿嬌鍾欣潼，就見個個都會拍拖，佢又真係想拍拖，而且仲愛上年紀做得佢阿爸的中年大叔王傑。
電影有兩幕印象最深，分別是周永恆為阿Sa出頭，聲稱會在黃又南間士多放屎蜢。那些年是第一次聽到「放屎蜢」呢個招數，將一隻隻沾滿糞便的草蜢放進仇家鋪頭，搞到周圍都係，十分狠毒。
另一幕就講王傑為搏阿嬌歡心，毅然效法徐錦江的金B造型，油到自己成身金色，扮成少林寺十八銅人咁向她示愛，一圓阿嬌的夢想。估唔到呢種古怪行徑又行通，令阿嬌覺得有被愛的感覺，非常浪漫。總之全片去到結局時，就個個都拍拖，個個都真係拍到拖，皆大歡喜。
馬偉豪執導的電影，除有一眾新演員，也會兼顧劇力，於是全片另一亮點是有許紹雄、黃偉文、鄒凱光這班鐵膽串星插科打諢，增添不少笑點。