【午夜場】夏天要睇鯊魚片　42年前《大白鯊》究竟點拍？

夏天梗係要去海灘，去海灘最怕乜嘢？冇人着比堅尼？無厘頭古怪油污？我就最驚鯊魚，就好似鬼咁，未遇過的東西當然最驚，游出海會冇咗隻腳，問你驚唔驚。

每年暑假總有一套鯊魚電影上映，今年的《鯊海47米》講兩姐妹出海入籠睇鯊魚點知個籠斷纜沉入海底，諗起已經標冷汗，但論緊張當然要睇明珠台重播過一萬次、史提芬史匹堡的《大白鯊》（Jaws），作為鯊魚片鼻祖這套42年前的電影已經玩人鯊困獸鬥，唔怕死男配角走入防鯊籠中以為真係可以防鯊，點知大白鯊連鐵籠都撞得爛，唔咬死都嚇死。話說42年前根本未有電腦CG特技，這場面究竟點拍？出海捉條真鯊魚？其實成條大白鯊只係機械模型，但就做到真嘅一樣，但因為當時史匹堡堅持要出海拍攝，搞到機械鯊魚成日壞，最後套戲超支幾百萬美金先拍得成，不過有乜所謂，《大白鯊》全球最後收4億美金，證明史匹堡是真正的大導演囉。