破地獄｜楊受成贈許冠文絕版名表　禁絕戴平表︰唔好話識楊生

由黃子華、許冠文、衛詩雅主演，導演陳茂賢執導的電影《破。地獄》，自上映以來，一直大破票房紀錄，而截止今日（23/12），港澳地區票房更大破1億4000萬，身為老闆楊受成博士向各演員派發金牌以示鼓勵，而去到兩位主角黃子華及許冠文，就有特別大禮。

原來楊受成博士為許冠文準備了一隻絕版名表，有「綠水鬼」之稱的綠圈Rolex Submariner，事緣有次許冠文跟老闆食飯，自言戴住一隻價值50蚊的深圳表赴會，結果被楊生笑罵：「你唔好話識楊生，我真係冇面同你做朋友，戴隻咁嘅表。」

而今晚就送出這枚私人珍藏，炒價接近20萬。許冠文更自爆當時有反問楊生：「你又知我隻表平？」楊生便風趣回應：「我賣豬肉㗎？香港鐘表大王呀。」

至於黃子華，就獲楊老闆贈絕版名酒，20萬起跳嘅Domaine de la Romanee-Conti，子華笑言貴到唔捨得開嚟飲，又怕放在家中會被打劫。楊老闆就提議他生女時可以飲，令子華要立即公開徵求女士肯同自己生女。