「唔該熄咗你個電話啦」唔止得二汶唱？ 你未必知歌中4個冷知識
由林二汶演唱的百老匯院線電影片頭，大家都識背識唱，但大家又真的對它完全了解嗎？不如問問自己，你知道這首歌的歌名嗎？你知道當中有把隱藏女聲演繹嗎？你又知不知這首歌其實有個金像獎版本？你又有冇留意而家入戲院睇的版本是個濃縮版？
答唔到？那就由二汶、戴偉、b.wing，亦即是即首歌、這個MV的創作團隊來解答大家吧！
1.「電影院禮儀」是這首歌的名字嗎？
答案是No。但正確的名字到底是甚麼，又好像沒人答得出。原作曲作詞人戴偉說：「我唔知，咪all we know, 或者 enjoy the show. 但最後變成叫禮儀歌。」b.wing聽到「禮儀歌」三個字即眉頭一皺：「禮儀歌……好似關死人事咁。」b.wing應該是想起2008年的日本電影《禮儀師之奏鳴曲》吧！的確好像有點不吉利。而另一邊廂二汶想了一陣子說：「應該係Enjoy the show。」好，我宣佈呢首歌係冇正式歌名。不過只要講出第一句「唔該熄咗你個電話啦」大家都明你在說哪首歌了，歌名係咩已經唔重要。
2.首歌有一位天后一齊唱？
大家聽到句︰「唔准吸煙咗好耐喇！」未知會否有種不是二汶在唱的感覺呢？二汶：「我哋其實是有邀請一位女歌手一齊唱的，所以主唱並唔係得我一個，哈哈……」那麼到底會是哪一位呢？大家不妨先猜猜，文末會有答案！（提示：某80年代的天后級歌手）
3.為何會有全新濃縮版MV？
這首歌分2015年及2016年兩個版本，新版較短之餘亦少了兩句歌詞。「前面係我個背脊，差啲比你踢歪（粵音me2聲）」不見了！亦沒有了最後「噓」的部分。為甚麼會變短呢？製作MV的b.wing就表示：「呢個係壯士斷臂嘅決定，因為戲院只容許播放一分鐘嘅宣傳短片。第一條完成後，結果要1分27秒，但因為大家都實在太鍾意，所以院商都照播。不過之後就出現咗問題，某啲比較長嘅電影根本播唔切呢條片，所以後來我哋就要做一個57秒版本，所以係要有取捨。」原來如此，現在要回味足本版，只可以回到網上尋找啦！戲院已經全面用新版。
4.除了原版外，二汶會常改成其他版本演繹嗎？
記得上年香港電影金像獎的頒獎禮中，二汶身穿A仔卡通服在台上演繹重新演唱新版本，為第35屆香港電影金像獎的開場帶起歡樂愉快的感覺，這首歌如此「出名」，二汶是否都不時改編表演呢？說起這段金像獎的回憶，二汶表示其實幾有壓力：「改晒歌詞我是頗擔心的，因為歌詞會tag晒所有影帝影后，我又不是主持，我應該用哪種態度唱出來呢？又跟他們不是十分熟絡，怎樣可以唱得輕鬆一點而不是輕挑，例如有一句︰『林嘉欣都等好耐喇』好在我認識她，如果不認識他會好難去唱，但係好好玩。」據知當日二汶變成吉祥物，大家在後台都爭相跟她合照，玩得很開心！
而除了金像獎外，二汶過去有個演唱會跟香港中樂團合作，原來中樂團指揮好喜歡這首歌，跟指定要有這首歌！「encore時改了歌詞『唔知點解個個未走嘅？我哋頭先係完咗㗎啦！』我好surprise指揮竟然會想指這首歌！」咁唔知年底at17合體演唱會，二汶與Ellen會否重新再演繹這首「神曲」呢？
開估！答案原來係葉蒨文Sally！快手聽多次，聽得出嗎？
其實，這不是Sally的真實聲音，是由二汶扮出來的，覺得似嗎？原來二汶很喜歡扮聲，一直想有首歌可以讓她「玩」，結果這首「電影院禮儀」就成為她的實驗品！二汶在整個錄音過程中，扮了十數把聲音去唱，以營造出大合唱的效果。戴偉就覺得她扮得很似：「二汶把聲好厲害，她唱甚麼key都可以，男仔得，女仔又得，溫柔都得。」咁二汶你玩哂啦！咦！如果二汶可以出首歌，不斷相聲，扮不同的人唱歌，似乎也滿有趣呢！