賀歲片｜馬國明湯洛雯不時放閃　高海寧羨慕︰有叫佢介紹男仔我識

由王晶同葉念琛聯合監製及執導的2025蛇年賀歲片《麻雀女王追男仔》，今日（18/10）舉行開鏡儀式，一眾演員高海寧、馬國明、陳家樂、陳靜、邱意濃、許紹雄、文佐匡、郭珮文、麥玲玲、林盛斌（阿Bob）等都有出席，其中馬國明與高海寧首次演一對情侶，高海寧︰「我哋反而做過夫妻。」

兩位都係第一次拍電影做男女主角，但因為是喜劇關係，過程未有太緊張，而馬國明在戲中是飾演一個生活潦倒，好有理想的科學家，自問好了解這個角色。「因為我現實生活都好潦倒，所以我都幾了解佢嘅生活，好明白佢。」

至於講到追男仔，馬國明坦言如果高海寧出招，一定好易。「佢咁樣行出嚟，係男人都嗒糖，樣同身材就係佢撒手鐧。」記者問到高海寧，婚後的馬國明可有甚麼不同？「又冇，佢不嬲都好好，佢兩公婆喺我面前都好sweet，得閒無事都打情罵俏。我有同佢講，如果有男仔追我，一定會畀佢過目，因為始終男人最了解男人，佢係一個典範可以睇穿對方係咪好男人。」高海寧更自爆曾經叫馬明介紹男仔畀自己識︰「因為我相信物以類聚。」