【腐視點】蜘蛛仔型男基友Harrison陪伴左右　粉絲想佢做新綠魔

警告：近乎零劇透，睇《蜘蛛俠》前做足準備，歡迎來到FF腦洞的世界（米奇老鼠腔）。

寡人好興奮呀！《蜘蛛俠：強勢回歸》（Spider-Man: Homecoming）話咁快就上，終於又可以在超巨大銀幕見到宇宙級可愛的新蜘蛛仔湯賀蘭（Tom Holland）！不過今日主力要講的不是阿湯本人，而是經常跟他出雙入對的青梅竹馬好基友Harrison Osterfield。小鮮肉識食一定一對食，雖然兩個人都屬皮脆肉滑的90後，但一脫上衣那身肌肉，嘩，嚇死寶寶，仲要double上，確實心血少點都死。

粉絲點留意到Harrison？好難留意不到，這對由細玩到大的「好兄弟」隔幾日就上載親密合照，又一齊出席所有電影宣傳活動。被阿Tom暱稱「Thing 2」的Harrison職銜是製作助理，片尾都有他的名字，有指是電影公司擔心阿Tom一個後生仔在片場（明明同場有大量學生演員同兩位年紀差不多的女主角…）太寂寞而作出的特別安排，好有心呀。有次跟雜誌《The Hollywood Reporter》做訪問時蜘蛛仔更無視劇透風險大爆好友有份出鏡：「我記得電影最後幾幕有一場追巴士戲，我因傷做不到，我老友Harrison當時亦是我的助理，只好穿上我的戲服代我跑。所以Harrison有少少客串鏡頭，太正啦！」

其實就快21歲的Harrison除擔任《蜘蛛俠》的製作助理外，本職是個演員，主攻英國獨立短片如《Ethan Adler's Guide to Homicide》、《Supply and Demand》以及《One in a Million》，有一定演戲經驗。有不少支持這對Bromance配對的網民都話Marvel同Sony可以考慮搵Harrison做原作蜘蛛俠Peter Parker的好友兼死敵二代綠魔Harry Osborn，有人更為此上美國平台change.org開網上聯署。對於拉好友入超級英雄世界，主人公阿Tom有另一番見解：「我覺得他可以演《神奇4俠》的「霹靂火」Johnny Storm，（對着Harrison）不過這樣你就會在Fox旗下，不能跟我在一起，我們不在同一隊，甚至不在同一世界觀，這樣好sad…」同學，這種公然在Facebook Live放閃的行為叫fans如何是好。

噢，by the way，明天（7月4日）是Harrison生日，記得留意蜘蛛仔同壽星仔Instagram等新相，兩位家陣身處南韓，Harrison預告話會去食韓燒同唱K慶祝，睇下有無粉絲成功野生捕捉到！

糖黐豆的Tom & Harrison：

2017暑假超多猛片，邊套最啱你心水？即click入我們的專頁投選最愛暑假電影！

＞＞2017暑期電影巡禮＜＜