《阿凡達2》9月開拍　占士金馬倫研發不用眼鏡睇3D

你有幾多副3D眼鏡？我就有10副：兩個袋各有兩副，屋企有四副，仲有兩副IMAX，其實我一家大細都冇10個人，一齊去睇《變形金剛》都戴唔晒；但3年之後，3D眼鏡可能從此成為歷史文物，占士金馬倫預定於2020年上映的《阿凡達2》，將破天荒成為首套不用再戴3D眼鏡便能看到3D效果的「裸眼3D電影」，可順便還番啲眼鏡錢俾我嗎？

占士金馬倫拍親戲都有無限金錢，《鐵達尼號》如是，8年前拍《阿凡達》都拍了18億港紙，今年9月開拍的《阿凡達2》他絕不手軟，據知投資超過4億美元（約31.2億港元），計劃2020年12月聖誕節檔期上映，拍攝長達3年除了因為一拍會拍足4集，更因為會引入全新科技拍攝。

占士的特技公司Lightstorm Entertainment，早前與科技公司Christie Digital Systems簽下5年合約，共同為《阿凡達2》研發新的數碼播放效果，包括研製一款新型RGB鐳射投影機，可播放超高像素及幀數的影像，並可在銀幕上製造景深，不用再戴3D眼鏡便能看到3D效果。暫時未知該技術與任天堂的3DS遊戲機有何差異，但未來入戲院不用再戴3D眼鏡必定成為新趨勢。

目前IMAX 3D電影的香港票價約180蚊左右，而李安去年以4K、3D、120幀數拍攝的《比利．林恩的中場戰事》，其台北首映禮正是使用Christie Digital Systems的4K投映機播放，而電影規格太高香港沒有一間戲院能播放此最高規格，全北京都只有一間戲院放到，票價達人民幣320元，《阿凡達2》以全新技術播放，戲飛究竟要賣幾多錢？300蚊入場睇一套戲你願意嗎？