【陸小菲相談室】原來消防員都會着T-back返工
咁啱返咗香港，咁啱又要食飯，咪傾大家一路開計一路傾飯囉。每次一間餐廳一餐飯一個故事，而今次就係一個關於消防員着T-back返工嘅故事。
撰文：陸小菲
【文章原刊於01撐場，歡迎下載香港01 app，與星級作者一同討論喜愛話題。】
話說小菲個BFF失驚無神一支箭咁飛返香港，小菲都唔執輸買到張平機票跟埋返去見下啲老朋友。事先聲明，唔係亞洲菜都一一唔食，平時食慣德國腸送電視，如果返到嚟都要食西餐真係好唔尊重香港囉。
小菲聽人講老鍋台式火鍋唔錯，加上尖沙嘴夠就腳，而且近地鐵站，起碼成日喺地鐵站度輪迴地獄又折返人間嘅小菲都識得去。一檯四個，好耐無見。由於小菲喺油麻地同黃埔之間來回咗三次，所以煲底已經揀好，菜都上埋，係未開始食已經算係好畀面小菲。
淨係屏風個通花已經夠中式，加埋啲昏暗嘅燈光真係暗到成臉油光都睇唔到呀。成檯人入面，小菲最耐無見都係打對角坐嘅Louie。唇紅齒白加埋一個陽光男孩嘅笑容，如果有一日唔再做烈火雄心，小菲都真係叫佢去選香港先生呀，話晒都做過救火英雄喎，騷肌都夠尖叫啦。小菲着住條深藍色嘅COS，對面兩位哥哥仔都一樣着白色同灰色T-shirt，猛男嘅dress code真係唔怕打邊爐會彈污糟。
各位觀眾，唔好FF住，Louie擇偶條件都好高，如果唔係小菲都放張相出嚟收吓媒人利是順手益街坊。
「喂，不如你講吓你返工見過最大鑊嘅嘢畀我知？」
「返咗咁多年先問？」做咗消防員一段時間嘅Louie一邊講一邊將CAB安格斯牛小排放入個爐度。「你唔係𠵱家先嚟睇中我呀嘛？」
佢緊係講笑。我哋呢檯人青梅竹馬識咗廿年，有兒女私情難過中六合彩。
小菲無視佢繼續追問：「咁最核突見過乜？」
「都係死屍㗎啦。跌落嚟會分散晒。」大學界的少女Winola終於出聲。
牛肉拎得上嚟，不過當小菲係男人嘅佢當然無畀我食先。但都放咗兩隻廣島蠔落去淥畀小菲同Winola，係呀好gentleman㗎，有興趣嘅話可以私信小菲。
工程師大隻仔Eugene問係唔係直入黑箱車唔駛經消防。
「有個帳篷，之後有仵作……」小菲呢啲時間緊係衝出嚟柒。
「仵作係驗屍㗎，嗰啲叫仵工。其實有啲都係消防執，個個做新仔都執過。睇吓land喺邊，如果喺podium都係我哋執，仵工剩係執平地。」
言談間問吓有無伙記試過睇到頂唔住要嘔，Louie話無咁誇張。小菲問佢腦漿咩色，Winola話Bio堂咪教過囉，Louie接住指住檯面碟羊肉，指落啲脂肪度話「就係呢隻粉紅。」
「平時救火你到底做咩角色？」大隻仔Eugene問啲問題係畀小菲合理少少嘅。
「『走呀！走呀！』帶頭走嗰個。」
大家追住問山火係咪好難救？邊度邊次嗰場大火你做過啲乜？Louie都答得好清楚，甚至教埋我哋乜嘢係「Fire Loading」（火災負荷），今次真係長知識了。
「其實最常救都係垃圾火。」小菲覺得幾好啊，唔係成日有大單嘢其實都係好事。
「救返個垃圾筒其實都好偉大。不過你地成班人去到睇住個垃圾筒燒呀？」
「係呀我地輪住用腳踩熄佢㗎。」Louie接住話：「不過有時香港人連燒烤場有煙都要報警，所以都無辦法。你做咩忽然咁有興趣？好似啱啱識咁要追住問『點解你哋要打排球嘅？』」
「嗰啲低級問題我三歲就問咗啦。我緊係問啲古靈精怪嘢，例如你哋可能會有話着咩色底褲無咁邪之類嘅嘢㗎嘛。」
「打麻雀咩𠵱家！」
生命悠關喎，好多時候都會迷信㗎啦，雖然Louie話無啲咁嘅事，但小菲深信應該真係有啲同袍會有自己幸運秘方嘅，拜得神多自有神庇佑嘛。
嗱，雖然Louie口講話痴線點會留意人哋着咩底褲，但最後都講咗畀我地知有條友仔着紅黑心心T-back返工，而關係於工作上見過最恐怖嘅經歷都係關呢個哥仔事。Louie透露有次打完排球，同平時一樣大家玉帛相見，大家都拎住條毛巾去沖涼無咩避忌。習慣着T-back嗰位人兄竟然對住某同事講：「你嗰度好靚。」呢啲比救唔到火更大鑊嘅關口真係要好強嘅心臟先過到，三魂唔見七魄；靚喎，咩意思呀究竟。路過畀人鑑賞，都幾老尷。Louie話男人老狗最多一齊笑住講吓邊個好勁抽，但以觀賞嘅角度出發畀人話自己個兄弟「靚」，呢個咁到位嘅形容詞真係就算係對於見過晒大場面嘅消防嚟講都真係太過勇猛喇。——註：小菲好明顯知道，通常啲人講話啲朋友乜乜乜嘅時候主角係自己，當然小菲識相無拆穿。
但小菲在意嘅係，原來消防員救火會熱到呢個地步？
「吓？點着T-back返工呀？外邊着制服舒服咩？」
「喂，唔通要我問佢你怕唔怕條褲刮親你屎忽咩？」
呢壇嘢真係傾到埋單。對於只係喺香港打過港式邊爐嘅小菲嚟講，台式真係舒服好多。加上嗰種同台灣無老鍋一樣追求黑得嚟打返少少燈嘅光暗度真係好舒服；只係呢種比港式雞煲斯文嘅環境唔太適合小菲返到香港盡情爆粗嘅意願啫，火鍋又點會夠打邊爐豪邁呢又（小菲母語係廣東話）。
最後，小菲諗起德國有個薯片廣告係用好HOT嘅消防員半裸跳舞熱辣辣嚟賣新出嘅辣味薯片。小菲以為條人魚線已經夠殺，只係無諗過消防裝下面同入面竟然可以係睇落應該唔太實用嘅T-back。後來問清楚Louie先知原來消係防無規定着乜underneath嘅，但佢怕住羞咁話多數着三角褲囉，始終着boxer同brief有汗時唔係咁舒服嘛。
勢估唔到有人着T-back咁HOT呀吓！不過咁樣講一講，相信各位少男少女嘅幻想真係出晒嚟。希望偉大嘅消防哥哥着T-back救人嗰陣小心啲，唔好刮親個 pat pat就好喇。
【編按：文章題目為編輯所擬，原題為「【陸小菲相談室】第一回：無呃你消防員真係好HOT！燒烤場有煙都要出動㗎！」】
（文章純屬作者意見，不代表香港01立場。）
作者簡介：陸小菲，一枚性格分裂小毒女。人前沉迷動漫和美劇，人後憂鬱自閉；自管自顧的超譯人生。只談月說風花，不聊明天以後；其餘的，就隨便吧。