【冬天來了】儲水式電熱水爐用家6大悲歌　只能沖15分鐘的熱水涼

冬天來了，代表著一眾使用儲水式電熱水爐的家庭，再次跌入無熱水或唔夠熱水沖涼的無限輪迴。有些事，只有儲水式電熱水爐用家才會明白；又或者，只有我們才會問，「究竟沖一個鐘熱水涼係咩感覺？」

 請點擊「全螢幕」觀看影片 

1.　等到花兒也謝了

用儲水式電熱水爐嘅家庭，
（等）沖涼時間比煤氣爐家庭多。
夜晚返到屋企秒速衝去開著熱水掣，
等呀等呀等呀，
至少要等15至20分鐘，
才等到水滾。

以四人家庭為例，
如果你是最後一個沖涼的人，
即使每人沖涼15分鐘，
加上中間等水滾的20分鐘，
即是要等上(15x3)+(20x3)=105分鐘。

2.　摩打手15分鐘沖完

長時間等待並不代表長時間享受。
儲水式熱水爐裝水不多，
即使不是將花灑扭到超大水，
水量亦只可以捱到15分鐘，
更遑論在天寒地凍之時，
稍一不慎開大咗水喉。

所以人人也會練成「搽番梘摩打手」，
希望在最短時間將番梘搽勻全身，
並爭分奪秒以熱水淋身。

甚麼冬天可以沖一個鐘涼暖笠笠？
I don’t care，
因為根本就唔關我事。

3.　扭細花灑

如果想沖熱水涼沖耐啲，
又唔係完全無方法嘅。
大家會選擇扭細花灑，
務求以「細水長流」方式延長使用熱水時間。

不過試想想，
扭細花灑後只淋到身體其中一邊，
另一邊仍然凍緊啊！

4.　突然停熱水

唔夠熱水最慘的事是，
有些熱水爐會「sharp cut」停熱水！

筆者上一個熱水爐會隨熱水減少而水流變弱，
但水仍是熱的。

換上新的儲水式電熱水爐後，
（唔好問我點解換極都仲係儲水式電熱水爐，我都唔知）
熱水會突然中斷，
試想想天寒地凍之際，
熱水在毫無預警下中斷，
淋在你身上的突然變成凍水，
除咗粗口，
我都唔知講咩好。

5.　熜咗熱水掣就大鑊

OK，咁我嚴守唔開大花灑、
唔沖咁耐，有熱水就夠。

少年，你太年輕了！！
你以為咁樣就無伏？
一年總有幾日，
你以為開咗熱水掣、
你以為熱水爐入面有熱水，
一開花灑，
十秒熱水過後，
又係一輪凍水歡迎你。

6.　洗頭沖涼要分開

用儲水式電熱水爐，
從來都無法在沖涼時一併洗頭，
永遠只能二揀一，
沖涼後呆坐20分鐘等熱水洗頭，
又或是，
洗頭後呆坐20分鐘等熱水沖涼。
遇上疲累之時，
等這20分鐘尤如永遠。
不如聽朝早啲起身洗頭？
（記得叫早過你起身嘅屋企人開定熱水掣呀！）