【旅遊小貼士】想做Pack喼達人？ 教你7招帶衫摺衫技巧
個個都去旅行，個個都想個喼放多啲嘢，但唔通個個喼都放到無限嘢咩！不過，要壓縮行李佔的空間亦有辦法！現在就醒大家七招，下次pack喼就識DO啦！
1. 跟隨5、4、3、2、1守則
「5、4、3、2、1守則」，
就是如果要去一星期旅行，
就不應帶多於
5對襪及內衣、4件上衣、3條褲、2對鞋及1頂帽。
當然，你可以按照行程，
決定會否帶泳衣等衣服。
出發前亦可了解住宿地能否洗衣及乾衣，
如果可以的話，
便可帶更少內衣及上衣！
有些人執喼時總會三心兩意，
認為「呢件我到時或者著」，
但亦有人認為，
「或者著」的衣服就不要帶了，
只帶一些「肯定著」的衣服便足夠。
2. 留意目的地溫度
留意目的地溫度也相當重要，
大家可按照預計溫度而選擇不同衣服。
如果目的地如日本及南韓等，
可選擇一般上衣加上大褸，
便於在有暖氣的室內調節衣物之餘，
亦可減省不必要的行裝。
筆者就試過帶上保暖內衣、抓毛衣、羽絨及大褸到日韓，
最後羽絨全程乖乖的躺在喼內。
3. 請用旅行裝梘液/化妝品
如果你旅行時入住酒店，
可先了解酒店是否有牙膏、牙刷、
沐浴露及洗頭水等供應，
如果你不介意使用酒店提供物品，
已可率先帶少一堆物品。
如果你仍想使用自家浴室用品，
並要帶上平日使用的化妝品，
最好帶上旅行裝，
或是將化妝品裝進小瓶子內，
可以慳到不少位置！
4. 唔好摺衫
唔係叫你隨便扔衫入喼，
而是採取「卷」的方法，
可以慳到不少位置。
除此之外，
亦有人建議使用一些方型袋袋著衣服，
整齊之餘，
亦可在帶同易摔破物品時，
放在側邊作「防撞欄」之用。
5. 以真空袋裝衫
想再慳位多一點，
可帶真空袋裝衣服，
如果所住地有吸塵機，
便可連抽真空機也不用攜帶。
事實上，
市面上亦有不少手壓式抽真空袋，
便宜之餘亦幫助慳位。
6. 勿帶燙斗或書等物品
有些人去旅行，
總愛帶本書去扮文青，
但最後一頁都無睇過。
唔想將大作家的著作變成負累，
可選擇電子書，
又或者直接不要閱讀了！
難得去旅行，
不如用心感受下當地文化？
至於燙斗等物品，
一來可以先詢問住處可否租借，
二來坊間亦有不少說法，
指洗澡時將衣服掛在浴室，
蒸氣亦可協助「燙衫」。
至於更誇張的有人帶同熊啤啤或卡通公仔出遊，
一隻熊啤啤已佔據三分一個至半個喼，
抵唔抵，你諗你喇！
7. 揀個輕喼，著起重衫
始終喼都係要自己拎，
裝咗海量嘢入去已經好重，
所以買喼時，
揀個輕喼都好重要，
畢竟唔少搭廉航去旅行嘅朋友，
行李要另外加錢買，
萬一「爆K」要臨上機前加錢，
就更肉痛啦係咪？
唔想「爆K」可以點？
可以選取一兩件較重的衣服著上身，
筆者朋友就試過到機場才發現「爆K」，
便決定在喼內取出兩件外套穿上身，
行李就剛好不超重了！