【打風百態】8號風球奉旨要開工？　排隊食早餐係幫兇

人一生遇到幾多個10號風球？狂風令大量樹木倒塌，許多地方水浸。不過，香港人一於好少理，唔駛返工就可以瞓晏啲慢慢食個brunch。至於服務性行業就無咁好彩，網上就瘋傳一張大型連鎖店給員工的通告，要求員工「除下八號風球後，需即時開門營業」，結果引來一番討論。

年初肆
世界光怪陸離，無人獨善其身。嬉笑怒罵，冷嘲熱諷，皆成文章。有人話，邊個揸住支筆，邊個就是無冕皇帝，就讓我做多一回皇帝。

連鎖店要求員工在8號風球除下後，即時開舖。潛台詞就是要求員工一早在店舖內stand by，隨時準備開工吧！究竟有冇必要這麼苛刻，要求即時開工？雖然說零售業屬於服務性行業，但打風天橫風橫雨，員工要冒著風雨出門，仲要可能在無公共交通工具下，提早回到公司候命，這樣合理嗎？

被寵壞的香港人

講真，香港人真係被寵慣了。好多香港人都覺得打風落雨，服務性行業要返工是應份的。以前打風前夕，大家都會去街市預早購買必需品以作防備，打風日子就躲在家中聽電台颱風消息。但今時今日，香港人好像奉旨咁，打風最大樂趣是遲起身然後落街食個brunch，再去睇場戲，所有服務性行業和零售業都好像必須在惡劣環境下提供服務，才是正常。

大家不妨留心一些服務業的facebook留言，一堆人在打風的日子問食肆、超市有沒有開門，為何10號風球沒有提供正常服務。將心比心，你都唔想冒住大風大雨趕住去返工，點解這些返服務業的人，就要在10號風球下仍為你提供服務？

好似我上次去台灣旅行，打大風時真係周街的小舖都關晒門，想搵嘢食都冇得食，結果是酒店每個房間都派兩個杯麵。係香港啲僱主先咁刻薄，在狂風大雨下都迫人返工。

感謝服務業的付出

其實我哋真係應該好好感謝巴士司機，每逢打風天，佢哋都會隨時候命，就算是在茶樓嘆住茶，但其實都係等候著公司的安排。當天文台一宣布改掛風球，司機大老就即刻去開工，為趕住返工的打工仔提供服務。

但其他行業呢？有沒有這個必要先？食肆和超市真係咁重要？要去到咁盡，打風都照開，唔開舖仲要被人鬧？香港人幾時變得咁無理。你打風日子就有多日假期，服務性行業的人就要為你犧牲，提供服務，真係應該咁樣？

僱員奴性太強

歸根究柢，為何近年服務性行業好像一定要在打風日子繼續提供服務呢？我就覺得是因為香港人奴性太強，個個都逆來順受，唔識去爭取權益。打風返唔返工，話就話要由僱主和僱員間傾一個最好的模式，但事實就是僱主用到盡賺到盡。結果所有打工仔都堅持到八號風球高掛才肯擠車逼地鐵下班，八號剛除下就立即冒塌樹墮招牌的危險趕上班，最多只會怨一句「冇打風假」，人人依舊工作至上。加上香港近年打風好像都無大意外發生，你班打工仔又唔出聲，唔用盡你哋咪蝕！

有人話打風叫外賣係無人性，計我話打風仲要叫人準時返工先最乞人憎。如果你也是從事服務業的話，打風天是否最令你討厭呢？不妨留言講下大家的感受。

你都想成為開筆一份子，稿件可電郵至opener@hk01.com；文章純屬作者意見，不代表開罐立場。