【月薪25萬？】中大law畢業做YouTuber Auman：開心過做律師
高考成績好、讀law、讀PCLL、見習律師、正式執業……如果命運能選擇，由Year1開始就努力讀書、不做YouTuber、不上莊，CGPA再高0.3，90後YouTuber Auman或者會踏上這條世人眼中的康莊大道。不過命運讓Auman走上另一條路，不穩定、目前還賺不了大錢，但他說：「畀我揀多次，我都一定會繼續拍片呢樣嘢。」
這天下午相約在Auman和朋友合租的工作室訪問，目測約二百呎的長形房間，一邊擺放了剪片電腦，另一邊是簡單的攝影棚，中間有張沙發，和一張得出睡眠痕跡的被子，「琴晚喺到剪片剪到3，4點」。問Auman是否才剛起床，他說9點已醒過來繼續剪片。
Auman早於2010年在英國讀高中時已開設YouTube頻道。點開頻道，內容由旅遊、生活、校園、英文講到政治，上載超過120條短片，最多人觀看的短片有超過42萬點擊，唯獨沒有時下最多YouTuber拍的打機片。「市場上有咁多打機嘅YouTuber，唔需要我都打埋機嘅。網上世界好玩，係因為有多元化選擇，如果個個都打機，就無咗個樂趣。」Auman的頻道剛剛達10萬個訂閱者，與當紅YouTuber比較，相差幾倍，但已夠獲YouTube頒「10萬白銀播放按鈕獎」。
拍片fail灰過做唔到律師
2016年從中大法律系畢業後，Auman並沒有如大部分人想像般踏上律師之路，因為GPA差0.幾才考得上成為律師前必讀的PCLL課程。「由Year2開始意識到可能入唔到PCLL，到Year3 Sem1幾乎肯定做唔到律師，都叫有個過程，所以無突然好灰。」反而到Year4，為了測試自己的拍片能力，花2萬元僱用攝制隊，拍攝一條10分鐘劇情片，但經驗不足拍了一條不滿意的片，「嗰條片灰過考唔到PCLL，自己好盡心盡力做，發現自己能力未到，會有落差。」
讀完法律，不做律師，大有人在，出路亦不少，有人做顧問、考政府工做AO、EO或督察、入獵頭公司等等穩定而且職業前景明朗的文職工作，Auman卻走上一條未竟之路。「人一世物一世，唔行拍片呢條路我唔會心息」——他去年7月特意拍片，在YouTube上宣布決定做全職YouTuber。
月賺6萬 下個月0收入
早前YouTuber Ming仔因與經理人解約事宜告上法庭，才叫人大吃一驚原來YouTuber月入可達25萬，但現實是高收入YouTuber仍屬少數。目前Auman的YouTube頻道仍未有穩定收入，「有時一個月有3個廣告，有6，7萬，下個月就0收入」，為了維持生活開支，Auman還要接拍片、剪片等freelance工作，約佔總收入4成。Auman沒透露實際收入，僅表示與大學生畢業平均薪酬相約。
Auman稱這是一條冒險之路，但肯定令人生嘗試到更多不同的事。「呢份工要做好多interesting嘅嘢，所以多咗推動力push我做平常人唔會做嘅事。」前年獲澳洲旅遊局贊助，到開恩茲拍攝旅遊特輯，激流，笨豬跳，skydiving通通要玩，「呢樣係做YouTuber嘅得著，為咗拍片，我敢做好多我唔敢做嘅嘢。」
為做導演 停工3個月 「多咗份使命感」
去年因YouTuber身份，Auman獲港大賽馬會防止自殺研究中心邀請，拍攝防止自殺劇情短片《最後一天》，與鄭子誠、艾威和游學修等專業演員合作，導演、編劇、剪接一手包辦。為全心全意拍好短片，Auman停工3個月沒有接拍其他廣告，連導演費也用在短片中，「3個月0收入，𠴱時有擔心『積蓄用多3個月就無喇喎』」。即使無收入，仍然覺得值得，「條片係講我哋應該做聆聽者、做聆聽者要注意啲咩。出街後有觀眾inbox我，話好想死，覺得自己好無價值，真係咁直接嘅message，我同佢keep住傾偈，後來轉介咗畀專業人士。幫唔幫到佢唔敢講，但暫時渡過咗個難關，叫佢等多一日，係多咗份使命感。」
香港地 讀書叻不等如選擇多
人人都說香港讀書不成就無出路，而Auman身為一個算是「讀得書」的學生又有另一番體會。「香港成績好一定係讀醫、讀law，成績好嘅選擇都唔係多咗。考試制度由成績主導，無咩空間畀你去諗想做咩。」Auman曾想過讀平面設計，但因成績好而選了人們覺得「人中之龍」應該要選的法律系，也發現不少同學跟自己一樣，「你問佢地點解要讀法律，十個有九個都答唔出，其實大家都係成績好，所以讀呢科。」
Auman承認畢業時如成績許可，大抵會隨大隊走做律師，「如果計錢、社會地位、同人吹噓，喺親戚面前認叻，我會揀律師架」，但回頭看才慶幸差0.幾的GPA，替他選了這條路。「以我嘅成續讀到PCLL都係做事務律師，可能一世對住地契樓契婚約」，也慶幸自己讀大學時，找到人生目標，沒有為讀書放棄拍片，「好似自己一手一腳湊大個仔咁，係最自豪嘅事，無人逼我做呢件事，然後好似做到少少成就」。
「到最後係，自己做邊樣野開心啲，係充實到我嘅人生，我覺得係YouTuber。」