旅遊節目是怎樣煉成的？　TVB主持梁彥宗解開3大迷思

每個打工仔都想找一份「筍工」，最好輕鬆有趣又賺到錢。相信不少人都會將旅遊達人歸入「筍工」行列，旅遊節目主持梁彥宗也指，聽得最多的話是：「正啦，有人畀錢你去旅行」。到底一個旅遊節目是如何誕生？梁彥宗為你解開3個迷思。

梁彥宗在美國普林斯頓大學主修生態學，曾參選被譽為「絕世筍工」的昆士蘭國家公園巡護員，打入最後3強後失落職位，回港做了3個月DJ，再到TVB做旅遊節目主持。2013年起參與了6個旅遊節目，包括《3日2夜》、《天與地》，《50日背遊中美》，以及7月剛剛拍攝完畢的中亞節目。

係鏡頭前講吓感受，介紹吓景點就搞掂？前中後期工作起碼3個月

從技術層面來說，旅遊節目大致可以分2種：純粹當主持或兼任製作，而梁彥宗就屬於後者。「如果你只係出鏡，都可以好享受嘅。我試過去呢類trip，真係唔使諗，交個人出嚟，藝員咁樣拍嘅話可以輕鬆好多。」

但當節目主持兼任製作團隊一份子，就要同時準備節目的前中後期製作。前期準備包括設計行程、計算每集拍攝份量、聯絡當地機構例如申請登山證、預訂機票住宿。後期製作則包括編寫VO稿，以及與導演進行剪輯。

而最大的壓力，就來自拍攝期間的變數，例如某些活動因意外取消，就要馬上找代替品填補那「消失的節目內容」。梁彥宗指：「例如plan咗ABC，但AB話無咗，而你要拍5分鐘內容，咁你點變出嗰5分鐘呢？嗰種壓力可以好大。」

日日食買玩？採訪發展中國家常遇意外

梁彥宗主打背包客旅行，喜歡介紹大自然歷險景點，而且兩個自己參與製作的節目－中美和中亞，都屬於落後地區，因此大多時候與輕鬆拍攝無緣。梁彥宗最難忘的一個節目是《50日背遊中美》，因為是自己第一次一手一腳策劃的節目。

到訪落後國家，不時都會遇上意外情況。梁彥宗曾在邊境被拒入境，因航拍而被警察拘捕，亦試過被扣留護照，慶幸最後都化險為夷。

最深刻的一次經歷，是最近一次到中亞山區拍攝。梁彥宗與攝製隊本來計劃乘車上山，但吉普車中途壞車，被逼徒步上山。結果，攝製隊一行人花了接近4小時才上到山，拍攝完畢已經天黑，唯有摸黑下山。「當時無預行山，所以無帶好多水，但水去程時已經飲完，而且中亞好乾。大家個口都好乾，亦都見唔到盡頭，路又唔係易行，摸黑行山其實都幾危險。」回程期間，導演更出現頭暈徵狀，但都唯有繼續走。幸好，村民因擔心團隊遲遲未下山，駛車上山查看，終於接走了攝製隊。

嗰陣喺山嶺，都的確覺得，哇，會唔會死㗎？

有人畀錢你去旅行？馬不停蹄日睡5小時

沒錯，拍攝旅遊節目是由公司出資，梁彥宗亦表示工作帶自己到訪很多從未想過踏足的國家，「講真，我會唔會畀幾十萬爬一個雪山？我真係未必會。又會唔會有得放50日假去中美7個國家？我相信好多人都未必做得到。就係呢份工畀我呢個自由度。」

但始終還是要工作，每天為爭取日光時間拍攝，一般只有5至6小時睡眠時間。「未必每秒都拍緊嘢，但車程都可以很辛苦。例如中亞好大，吓吓都坐5、6個鐘車，試過坐16個鐘車，咁你就成日喺車。其實你坐完車已經好攰。」

希望拍出有意義的旅遊節目

香港旅遊節目題材多以食買玩為主，梁彥宗認為是市場所需，但自己就希望可以拍出有意義的旅遊節目。例如多介紹各地動物，宣揚保育，真正讓觀眾看到世界之大，而且，日本之外，世界還有很多值得去的地方。