【溫多娜手記】優品360每月都有產品試食會　CEO：伏等我哋中

零食連鎖銷售商優品360（2360）今日搞咗個試食大會，行政總裁許志群同埋記者齊齊擔任試食員，試食咗12款產品，包括自家品牌Kalbarri無花果果乾、永年士多蝦子麵、KitKat櫻正宗大吟釀朱古力等等。

每月引入約60款　食品、日用品都會試

許志群話，公司採購所有產品前，都會預先試食，「伏等我哋中，好野用嚟賣」，試食後再決定入唔入貨，唔會因為價錢而犧牲質素。採購部同事在採購潤膚乳、洗頭水等產品前都會先試用一段時間，但家居用品則未有試用，公司依家每個月大概引入50至60款新產品。

迎合潮流採購　將發掘香港製造特色產品

許志群透露公司嘅產品試食每一星期或兩星期舉辦一次，每次自己都會親自落場，試食20至30款產品，但唔少產品係唔好食或者未必岩香港人口味，最終只得三至四成有得留低。

許生話，公司會迎合潮流來採購產品，例如買入健康有營產品 、高質美味嘅速食產品，以及創新口味或外觀、或者選用新穎特別材料配搭嘅食品。今年就會嘗試發掘香港製造嘅特色產品，希望將香港製造介紹俾世界各地嘅客人。