【溫多娜手記】滙豐「華仔」情人節肉麻示愛　AXA邀男神大唱冧歌

情人節剛剛過去，有網民早前就將李克勤一首勵志名曲《紅日》，改成抵死啜核嘅「2月14顛沛流離」。但情人節無情人又有咩好怕喎？近年好多公司都會出盡法寶，喺情人節冧掂一班員工，其中保險公司似乎特別「有愛」！

華仔約員工食Tea切Cake

話說尋日滙豐保險一班同事，晨早流流就收到一封由「華仔」Send來嘅電郵，竟然公然示愛，「回望過去兩年，我哋手牽手、肩並肩所做嘅一切，我更加知道你對我哋係幾咁重要。」內容情深款款、肉麻非常，仲約定同事下晝2點半一齊食Tea切蛋糕。

呢位「華仔」，原來就係滙豐保險香港行政總裁文德華（Edward Moncreiffe）！雖然見唔到「真‧華仔」，但一班夥計有蛋糕食，又有呢位「整古做怪」嘅老細，應該都玩得相當盡興！

AXA邀男神Office大唱冧歌

滙豐保險有「華仔」撑場，但另一邊廂，AXA安盛亦唔輸蝕，請嚟「男神」藝人張彥博為同事派朱古力，兼且送上一首首冧歌。唔單止咁，張彥博仲同AXA安盛一班手足一齊影咗張心心手勢照，再上載去社交平台，幫公司捐款去香港防癌會，將愛心分享畀其他有需要嘅人。