【溫多娜手記】黃國英逆市擴充office　掛「獅子王」油畫有寓意

豐盛金融資產管理董事黃國英（Alex）前排玩「低調」，佢今日精神奕奕見大家，原來係辦公室擴充之喜。

今次辦公室新翼擴充多600多呎，總面積達2千多呎，Alex今日仲同太太一齊出來切燒豬。不過，佢就好謙咁話，唔係逆市擴充，只係咁啱隔離租客搬出，租金水平與舊翼差不多，裝修就大概花了40萬元。而辦公室仲留左4個位準備請人，Alex 透露有意再請都是負責trading的同事。至於幾時請，他就話「等個市再好返啲先講」。

今次新翼Office，都有一幅由Alex親手揀的畫作，是「獅子王」內一個場景。他就解釋這個場景並非電影的最初，而是結尾的畫面，是代表著「傳承」。看來經驗老道的Alex開始「師傅」上身，想培育更多後進，為操盤界添「新血」。畫作金額約5位數字，唔算貴重，但極富意義。

港股市況波動，Alex都話今年「我做咗咁耐，今年係第一次淨流出，單係錢的話，都係最近兩三個月嘅事」，而客戶流出率則少於1%。他補充該行現時管理資產總值約12億元，較高位少2成，而客戶人數則約700人。

未來部署，他都話自己睇好年底新興市場收復失地，提前做左12月Call；而之前就已經沽左瑞聲（2018）和舜宇科技（2382），轉為新地（0016），新地現時更是其港股第二大持倉。Alex自己亦承認現時個倉的風險多左，因股票集中，加上又多左期權，但這樣的情況下，直言：「估中左就effective」。