【溫多娜手記】新地贊助單車節　郭基煇臨急學踩　幫公司出戰！

大公司近年都時興贊助大型運動比賽，原因無他，一來可以推動體育發展，二來又可以「軟銷」企業形象，Why Not？好似琴日舉行嘅「新鴻基地產香港單車節」已來到第四屆，吸引逾5,000人參加，已變成世界級單車比賽同盛事。

出錢容易，出力難！最為難得嘅係新地﹙0016﹚執董、郭炳江阿仔郭基煇﹙Adam﹚再次「身體力行」出戰50公里賽，於1小時20分鐘時間內完成，一啲都無「揸流攤」。

其實，好多人都知Adam係單車迷，自然心諗「咁新地冠名贊助單車比賽，又有咩出奇？」Adam琴日就借機爆咗個「秘密」出來。原來，新地應承贊助單車節，第一年公關部同事已向佢「施壓」，要佢代表新地出賽，呢位「少爺仔」才臨急抱佛腳認真學車。Adam話，之前真係同單車好陌生，淨係喺私家車度見到好多單車手嘅時候先話覺得，「嘩唔該借歪，唔好阻住條路！」自從第一屆單車節之後，Adam話多咗同各種各樣嘅單車手或港隊成員傾計，就開始畀單車背後好多不為人知嘅感人故事同精神感染到。

所以，除左贊助香港單車節，新地仲搞埋「新地單車學院」，鼓勵多啲香港人不忘「香港精神」，當然亦不忘鼓勵大眾實踐「為人為己，運動行善」嘅精神。Anyway，踩單車強身健體，又可以創造社會價值，一於加油！