【世界盃】陪男友睇波先惡補球例 最怕是男人波衫當時裝：好呀叔
請珍惜那個樂於陪你睇波的女朋友。
世界盃開鑼，對球迷而言是一大盛事。若然你對足球零認知零興趣，可身旁的男友卻是死忠。那麼這一個月，你就要忍受一下「第三者」的介入。
兩個人拍拖，總想著要融入對方的生活，讀他愛看的書、吃他喜歡口味的雪糕、看他熱衷的球賽。筆者亦曾經因為男友而開始睇波，可世界盃踢完了，就沒再看。最後關係完了，連看到別人穿波衫也覺得可怕。
Stephen和Karen，一個狂熱球迷，一個本來足球冷感。受男友的多年影響下，Karen也逐漸被薰陶成一個「及格」的球迷。
你有你睇波 我有我煲劇
相識十年，拍拖接近七年，中學畢業後，兩人一起到美國讀書。由於家住不同地區，Karen趁假期的空餘會到男友的家過夜。未拍拖之先，Stephen通常一個人睇波，偶然才會約朋友。但拍拖後，絕大部分時間都是跟女友看。名義上是一起看，實際卻是「你有你睇波，我有我煲劇」。問到會否有被冷落的感覺，Karen毫不猶豫直言：「佢唔夠膽唔理我。」男友笑著默認。後來，她從只看世界盃這類大型球賽，到一些聯賽也會跟著看。無懼時差所限，只要他看，儘管她打瞌睡也陪他看。
女友必問問題：「甚麼叫越位？」
不明解，自然要問，對不對？但男人總愛取笑身旁的女人對足球的無知。說到這，Stephen給了她突擊測驗：「咩係越位？可唔可以講吓？你好似依家都未係好清楚。」「我知！進攻一方球員......唔可以超過對方後防龍門前......最尾一條線。」斷斷續續整理出答案，雖未完全正確，可男友亦表示「收貨」。
「我應該唔係問好多問題啫？係咪啊？」Karen反問。男友在旁面有難色，再一次默認。她補充，不會即場問問題，先是自己「惡補」，再不懂才會問。除了經典問題之外，她也問過甚麼是界外球、角球，最令Stephen印象深刻的一條問題：「點解保方拎唔到英超金手套？」「乜保方係英超架咩？」他一語破的。Karen對男友的輕視表示無奈：「咁我想了解發生咩事呀嘛，正如你煮飯落幾多水，落到邊個位，當你問咁簡單同低能嘅問題，我都會答你啦。技術性問題，你明唔明？」「明。」男友確實沒有反駁的餘地，可謂技術性擊倒。
跟一班男人睇波 總是被質問
Stephen的「睇波團」中，只有Karen是唯一會出席的女友。除了陪睇波，她亦會陪打機，她笑言「佢哋成班都當我係半個男人咁」。作為群體中的少數，自不然成各人的追擊對象。她記起有次聚會，被質問有關足球的知識，其中一題要說出曼聯現役的十個球員。她絞盡腦汁吐出幾個名字，卻也成為他們的笑柄。
即便如此，她還是會參與「睇波團」的活動。究竟跟一班男人睇波有何樂趣？Karen分享：「同佢地睇波，感覺似你同一班女仔朋友扮靚咁。你會感受到佢地對足球嘅熱血同bonding。」坦言嘗試融入，卻總是差了點知識。「同你叫男人化妝一樣之嘛。」「我知佢有盡力嘅。」Stephen終為女友說句好話。
失戀台灣行撻著暖男 一句情話摧毀longD 不想付出驚覺這不是愛
喜歡跟女友還是朋友看？
記者問了一條唯恐天下不亂的問題：「你鍾意同女友定朋友睇波多啲？」話音未落，她就搶先回應：「我幫佢答啦，一定係同朋友睇開心啲嘅。共鳴大啲，又有種I know you bro嘅感覺。」不讓男友為難，又願意出席她形容「成班麻甩」的聚會，對此，Stephen說了一句讓旁人「毛管戙」的話：「最好係你啦！」「我知你想約朋友，只係佢地唔『蘇』你先搵我睇。」這已是訪問中僅有的打情罵俏對話。
男友送波衫 卻不許穿
作為球迷，少不了買印有球員名的球衣，Stephen也不例外。瘋狂的程度，她說他曾叫在英國的家人把所有印上曼聯球員的球衣都買下來。除此之外，他也會偶然送她球衣。「應該係買兩件有折。」「無咁既事。」七百多一件，划算嗎？「你知唔知女仔可以淘到幾多件？」重點來了，他把球衣送給她，卻只準她在世界盃等「大時大節」才可以穿。原因是「印咗字唔可以洗，會好易甩同會黐毛。」對於愛收藏的男友，她慶幸對方不是把球衣當平日裝束：「有啲人可以一星期著三、四次，印象中好似只有呀叔先會咁做」。
他們的英國之約
英國之約，是源於Stephen小時候的一個遺憾。當時他跟家人一同到英國旅遊，本來約定到曼聯主場－－位於曼徹斯特的奧脫福球場，在倫敦出發要坐幾小時火車，可時間不夠，只能到車路士和阿仙奴的主場打個轉。後來女友跟他約定，只要大家存夠錢，有時間必定去走訪一次。
在整個訪問中，Stephen的表達一直較Karen被動，看似是一強一弱的關係。儘管她口裡常嫌東嫌西，可是默默為他買球賽票，努力融入他的生活，這些舉動，不難看出她其實是個口硬心軟的人。
不厭其煩地再說一遍，請珍惜那個樂於陪你睇波的女朋友。
***
《女生》總在你身邊，請立即下載《香港01》App
【兵仔轉型】男生5年來潛伏「姊妹」身邊 旅行突然變man成功上位