【見習媽媽湊仔經】我的隊友
記得我們初相識既時候，我老公係唔喜歡小朋友，咁唔講得上憎，但就係⋯對小朋友沒什麼感覺，唔會覺得佢哋得意，又唔會想同佢地玩咁囉！
直至我陀住阿仔，我老公係喜悅嘅，但我知佢心目中嘅責任，壓力同不安感比期待大。相比我一心一意寄望孩子健康出生的那個份純粹，做爸爸就係另一層次嘅複雜。
【編按：作者及攝影為見習媽媽】
記得當年，我由入院到阿仔真正出生，我哋足足捱了三日三夜，整整60個鐘！我固然辛苦，當時我老公都係寸步不離，雖然當時佢唔可以係產房陪伴，但我每一次，無論幾多點，咬實牙關步出產房都會見到我老公疲憊又憐惜嘅面孔。雖然佢言語上唔識表達，我亦痛到無話可說，但佢每次用手輕輕掃掃我企唔直嘅背脊，用一個愛莫能助嘅眼神望住我，我都知道，佢係好心痛我，好支持我。
到孩子降生，新手爸爸竟然唔夠膽親手抱抱呢粒軟棉棉嘅親生嬰兒! 到爺爺抱過啦⋯⋯再三鼓勵支持加教路，爸爸先夠膽生硬地抱抱自己個仔，當時佢到底係咩感覺呢？可能要搵日叫佢自己寫下。
新手爸爸，開初當然係一位豬隊友，但我見到嘅係，佢進步好快，每天都同孩子一齊成長。咁當然啦，我係毫不留情地，每次做出豬行為時都會嚴重投訴佢⋯就好似，埋檯食飯，媽媽梗係負責餵仔，完全忘我， 爸爸自顧自咁食，晚餐完結，返到屋企我叫肚餓，豬隊友竟然講：「頭先你做咩唔食？」
有幾多媽媽遇過請過來取暖
幸好，而家總算成長啦， 唔單止識得餵食老婆，夾餸斟茶遞水，仲識自己食完就幫手照顧，等老婆有啖飯食下。
如果我喺屋企，當然我仍然係主力啦！陪玩陪食陪瞓，一日嗌三百次媽咪。但每次我離家，我老公都會神隊友上身， 自動自覺陪玩，陪捉棋，讀圖書，睡前故事，睡前按摩，接送興趣班，全部做足。
睇見兩位老細都好滿意爸爸表現嘅時候，心入面有一種奇奇怪怪嘅感動。好似「呀⋯⋯唔使媽咪都搞得掂啦？」但係唸深一層，隊友如此努力，交足功課，其實都係想出門在外嘅媽媽能夠安心，可以專心工作，其實係另一種愛，一種支持。而家諗返起以前嘅豬隊友，呢位神隊友嘅表現實在令人感到難以置信，睇來我可以嘗試同契媽plan下去次閨蜜旅行囉～
可能有時候，我地做媽媽都應該學習放手，將要求降低，俾爸爸湊吓仔，一來俾自己一個休息機會，二來俾小朋友跟吓爸爸，可以全人發展一下，亦係俾隊友一個進化機會，能唔能夠成為神隊友，可能就係睇呢個機會啦！
#離家媽咪收到相有感而發
#爸爸goodjob
#我隊友
更多文章：【留住童真】將兒子畫作製成頸鍊永久保存 媽媽：要將幸福戴在身