【有洋蔥】小朋友見父母好耐冇放假 叫護士寫父母名落自己病假紙
小朋友的願望就是想和爸爸媽媽一起去玩，但在香港很多父母都是上班族，要一起放假真的很困難。由一護士開設的專頁「診所低能奇觀」就上載了一個感人故事，講述有小朋友看醫生時希望病假紙上寫上爸爸媽媽的名字，希望可以與父母一起出去玩。
這個故事一出，引起不少父母的反思，到底平時是否也沒有時間陪小朋友呢？
有日一位媽媽帶住一個小朋友嚟到診所。
媽媽個樣非常非常非常攰：「姑娘，小朋友睇呀，睇過嘅，係咪好快有得睇？」
我：「等四個，你有冇佢張覆診卡？」
佢：「冇呀，唔知擺咗喺邊啦」
我：「咁麻煩你講個登記電話號碼我知啊」
佢：「XXXX-XXXX」
我：「搵到㗎啦，轉頭俾返張覆診卡你啊」
佢：「嗯」
佢拖住小朋友行去坐低，喺等候期間，媽媽一直閉目養神，小朋友就眼仔碌碌周圍望，有時仲會偷望吓媽媽。
我：「太太，可以入去見醫生啦」
咦？真係瞓著咗喎。嗌都冇反應～我望望小朋友，小朋友望望我，再望望媽媽，拉拉佢嘅衣角。
小朋友邊拉邊細聲嗌：「媽咪，入得去啦」
媽媽睡眼惺忪企起身：「嗯」
睇完醫生後，佢哋出嚟等藥。
媽媽繼續邊閉目養神邊等呀等～
又係我嗌醒佢：「可以攞藥啦」
再一次唔醒…今次小朋友冇再扯媽媽件衫～冇再嗌佢起身。
佢喺媽媽手袋拎出銀包，自己一個行埋嚟同我講：「我可唔可以自己攞？」
我：「你知道啲藥點食就得㗎啦」
佢大力點頭。
我：「全部藥每日四次，每次食一匙滿嘅，呢枝係退燒止痛，你有需要先食就得㗎啦，仲有今日聽日兩日病假紙我放埋喺袋入面。」
佢望住我停頓了。
我：「做咩呀？有啲咩問題？」
佢：「張紙...」
我喺袋入面拎返張病假紙出嚟：「呢張？做咩呀？」
佢：「係咪寫我名㗎？我就可以唔返學？」
我：「梗係啦～你睇吓有冇寫錯你名？」
佢：「寫媽咪爹哋名得唔得㗎？」
我：「唔得㗎～係你睇嘅就要寫你名㗎啦。你媽咪爹哋唔舒服嘅就要嚟睇醫生先可以寫佢哋名～」
佢：「我好耐冇見過媽咪爹哋一齊唔駛返工...」 佢：「爹哋應承咗同我去玩...」
媽媽起身了，佢行埋嚟：「我聽唔到你嗌我嘅，唔好意思呀」
我：「小朋友佢自己嚟咗攞藥啦，佢好叻呀，太太你睇嚟好唔夠休息咁喎？」
佢唔好意思：「返工忙呀嘛」
我：「你又返工又湊佢咁勁嘅～」
佢：「唔係呀，學校突然打嚟嗌我接佢去睇醫生，我攞鐘走出嚟咋，轉頭湊佢去奶奶度㗎啦」
我正想開口，佢打斷我：「姑娘，都係三百呀可？得㗎啦可？我哋趕時間去嫲嫲度呀，同姑娘講拜拜啦」
小朋友繼續手拎住張病假紙，一直望住離開診所。
（節錄自專頁「診所低能奇觀」）
不少家長見到此Po文，都紛紛留言表示見到流淚，而且更有一批人大呻香港不適合生小朋友，又坦言做父母是辛苦。而Po文令到大部分家長反省自己已經很久沒有陪小朋友去玩了。
【相關文章】：【有洋蔥】小朋友見父母耐冇放假 叫護士寫父母名落病假紙