【街跑媽媽】哪怕迷失的青春│Shirley
當一個人活了幾十年，就是喜歡想當年。那些年笑中帶淚、有得有失、熱血過、也好好戀愛過。以為自己愈走愈清醒，卻是愈行愈糊塗，還以為自己的足跡可以成為年青的借鏡，希望他們能走少一段冤枉路。其實路必須要自己跑過、錯過、領略過甜、嘗過苦才看透自己的原始。
【編按：作者為街跑媽媽Shirley】
（相片由作者提供）
一個頹廢到淨係識得打機嘅人
最近，我在我青春期的兒子臉書上閱讀到他一篇真摯的分享，道出他充滿掙扎與迷失的青春，我經他同意下，修改了別字，原文如下：
「喺呢一年發生咗好多事，令我改變咗好多。由離開咗泳隊之後掛住打機唔去訓練，當時嘅我已經半放棄運動，嗰段時間真係頹得好緊要，每日放學我淨係識對住部電腦，之後成個暑假都幾乎冇去訓練。過咗暑假之後，我去咗一次訓練，嗰次jeffrey係咁鼓勵我練習返，雖然我都冇乜理會，喺九月嘅時候係youtube 見到 ITU ( 國際三項鐵人聯盟) 嘅比賽片，之後開始燃點起我嘅鬥志。
喺九月尾嗰兩個星期，我自己落街跑步同踩車，等自己可以戒咗打機，去到十月第一個上學日，我開始返我既訓練，但當時嘅我冇乜目標， 我要一個星期之後，我欠交功課紀錄多咗5次，因為我每日放學就坐個幾鐘車去大埔訓練，訓練完又坐個幾鐘車返屋企，返到屋企十點幾，食完嘢之後打算攞啲功課出嚟做，但係好攰冇精神，之後第二日就欠交。每逢星期二四因為去游水， 所以要帶好多嘢，書包冇位放功課，結果帶返學嘅書包入面冇一樣嘢係同學校有關，只係10月中好似每日返學校朝早做功課，欠交功課次數冇之前咁頻密，但係去到而家都欠咗20樣。之後喺一場水陸兩鐵比賽我攞咗個第三，我終於覺得 付出過終於有回報，又喺陸上兩項鐵人比賽攞第二，而家每日訓練成為我生活嘅一部分。
喺呢一年，我由一個頹廢到淨係識得打機嘅人，去到依家搵到自己嘅目標，有咗360度嘅改變，中途失去過好多嘢，過程亦都好辛苦，但好享受。如果冇咗教練、隊友、朋友同家人嘅支持，可能我已經放棄咗返番之前頹廢嘅我，希望可以堅持到死嗰一刻。 」
哭過痛過還是做最原始的自己
那段日子我不太懂用說話表達我內心的痛與苦，只好以墨水代替淚水，在那幽暗的角落，一字一句抒發我內心的情感，夜闌人靜我問了很多不明所以的問題。究竟人還能可以去到幾低處？究竟他真能有改變的一天？究竟我還能忍耐多久？究竟一個年青人不自尋短見已經是幸運？黑暗的日子不易看到雲上的太陽，但你又不能否認黑暗背裏有光。當哭過痛過還是做最原始的自己，「接納」和「擁抱」，靜靜地等他從黑暗的洞穴出來，給大家一點空間。
讓我們的孩子經歷迷失，破繭定能高飛。
這就是青春吧！！