【情人節】女神沙律親自傳授必勝約會妝容貼士 用6件化妝品就搞掂
一年一度嘅情人節就快到喇～ 無論係有情人或單身嘅你，都會約埋伴侶或者曖昧對象一齊共渡情人節，來一場甜甜蜜蜜嘅約會。咁特別嘅日子當然要悉心打扮一番，展露自己最完美嘅一面。想要令男生對你眼前一亮，好感度爆登，除咗需要喺穿搭上花心機，當日嘅妝容都係決勝嘅關鍵！今次就好榮幸邀請到真女神——沙律（張沛樂Charlotte Cheung）教各位姊妹化情人節甜美約會妝容，想要跟沙律女神偷師學藝，俘虜男神嗰心的話，就立即click入上面條影片睇睇喇！
今次沙律分享咗好多化妝上嘅小技巧，原來一個看自然日常嘅約會妝容背後喺蘊藏咗咁多小心機，小編都覺得上了一課啊😆！不過，古語都有云「工欲善其事，必先利其器」，想要化出令人好感度滿滿又gf-able嘅妝容，所選用嘅化妝品都係至關重要，即刻睇埋沙律到底用咗咩化妝品喇！
眉妝
PERFECTLY DEFINED LONG-WEAR BROW PENCIL 炫目持久眉筆 HK$340
粗、黑、平嘅韓式一字眉經已被淘汰喇，彎彎自然又柔和嘅眉毛先係王道！沙律就教大家畫眉毛時候，要先搵出眉頭、眉峰及眉尾。畫眉時切忌太用力，必須要溫柔地一筆又一筆咁描繪出毛流感。
Bobbi Brown炫目持久眉筆嘅筆尖係特殊斜角設計，方便精準勾勒眉尾及眉峰位置。而且，筆芯質地細滑，輕易上色、顏色均勻、唔會結塊。仲要16小時超防水、極耐汗，咁即使約會一整日就唔怕溶喇！
眼妝
THE ESSENETIAL MULTICOLOUR EYE SHADOW PALETTE - Into The Sunset HK$360
情人節妝容嘅重點當然係要化出甜美感、親切感、溫柔感。所以太過色彩繽紛嘅玩味妝，又或者係妖艷媚人嘅煙燻妝都會嚇怕男生們㗎😖！
所以沙律就揀咗一個顏色自然日常嘅大地色系眼影盤，最後再加埋小小帶珊瑚粉色嘅胭脂點綴眼妝，增加甜蜜度之餘，仲可以同胭脂顏色做番首尾呼應𠻹！
鐘意自然妝容嘅你，可以好似沙律咁利用眼影盤入面最深嘅啡色代替眼線筆，用眼線掃勾畫出眼線，咁樣唔單止有放大雙眼嘅效果，而且眼神望落仲會更加柔和，冇咁凌厲喇！
INK LINER 眼線液 HK$240
若果想要大眼效果再明顯啲的話，可以利用眼線液筆加番小小眼線。不過沙律就教落，雙眼皮唔係特別高嘅姊妹千祈唔好將眼線畫太粗，否則眼線蓋過咗雙眼皮褶位就會令眼晴望落變細，弄巧反拙。
Bobbi Brown 眼線液更係沙律嘅心頭好，因為筆芯夠尖又唔容易開叉，輕鬆就可以畫到好幼細嘅眼線，啱晒化妝新手啊！
NO SMUDGE MASCARA 不脫色持久睫毛膏 HK$270
嚟到整個眼妝最畫龍點睛嘅一步，當然就係眼睫毛喇！根根分明，又長又捲曲嘅眼睫毛不單止可以放大雙眼，更重要係望落更加Bling Bling有神又楚楚可人，想要用雙眼放電嘅姊妹絕對唔可以漏咗呢步。
首當其沖係要揀啱睫毛膏，事關睫毛膏決定住整個眼妝嘅「成或敗」，得定唔得就靠佢！Bobbi Brown 不脫色持久睫毛膏塗上後即時有增長及豐盈效果，即使壘塗都唔會出現結塊或「曱甴腳」情況。捲翹度及持久度都Keep到一整天，另外有埋防水功能，就算男朋友氹得你感動到喊都唔怕溶妝！
腮紅
SHIMMER BLUSH- CORAL 閃爍脂胭 - 珊瑚色 HK$250
胭脂係最容易失手嘅地方，一個唔覺意重手咗就分分鐘秒變「馬蹓屎忽」。所以，沙律就揀咗 Bobbi Brown 閃爍脂胭，珊瑚色唔挑膚色，搽上臉自然又提氣息。裡面仲有非常幼細嘅珍珠粒子，可以打造出有光澤感嘅腮紅，連之後搽Highlighter嗰步驟都慳番𠻹！
唇妝
LUXE LIP COLOR HK$280
最後一個步驟就係搽唇膏，唇膏顏色千萬千萬唔好選擇大紅色，一來普遍男士們都唔識得欣賞，二來佢哋會覺得你化到「血盆大口」咁，原本想同你錫錫都立即退後一步啊🥺！
沙律教大家選擇唇膏時要配合番腮紅嘅色調，所以佢就搽番豆沙色嘅唇膏，咁就唔怕突兀，成個妝容仲可以保持番一樣嘅色tone。而且豆沙色溫柔又唔誇張，搽完顯白又提神，重點係夠平易近人，男神見到你都唔會掉轉頭走人！🤣🤣🤣
(產品資料以官方最新發佈為準，價錢最後更新至2020/02/06)