【藍潔瑛逝世】落難明星曾遭厭惡　忠粉上門送飯　街坊贈百元解困

昔日「靚絕五台山」影星的藍潔瑛，星途璀璨，影視雙棲事業得意。直至九十年代後期，藍疑因被知名男藝人性侵，導致精神有異，長期失業，最終破產……藍潔瑛上半生受萬人簇擁，下半生洗盡鉛華搬到赤柱公屋居住，卻終日在住所、巴士站失常大叫，嚇煞眾多街坊。一代明星竟淪為赤柱街坊的「不受歡迎人物」。惟幸藍近年情緒受控，精神逐漸飽滿，漸為街坊所接受，間中更有婆婆會給予100元她買嘢食。今晨（3日）藍潔瑛被揭倒斃家中，有街坊對於藍突然離世，感到惋惜。

本來係一個好風光既身份，跌到咁低，俾任何人都未必受到咁嘅刺激！

搬到赤柱初時　經常失常大叫　嚇煞街坊

馬坑邨良馬樓的互委會主席古先生表示，藍潔瑛在馬坑邨居住已有7至8年。初搬來時，藍經常在住所大叫大嗌，聲浪極大，令上下多層住客不滿；藍間中在巴士站、小巴站失常大聲鬧人，嚇煞街坊。昔日的明星，竟淪為街坊街中的「不受歡迎人物」。惟古先生指，雖然街坊飽受困擾，但對她相當包容，並無投訴藍潔瑛，古坦言：「本來係一個好風光既身份，跌到咁低，俾任何人都未必受到咁嘅刺激！」

上星期藍曾到大堂求助　街坊幫忙開樽蓋

古先生認為，近兩年藍潔瑛有定時食藥，改變很大，精神相當飽滿，「完全無嘈過，好有禮貌」。上星期藍潔瑛更因無法打開樽裝水的樽蓋，而到地下大堂向女保安求助，古先生當時剛巧經過，該順手幫忙，事後藍潔瑛亦有講句：「唔該哂」。古認為近年街坊已然接受藍潔瑛，「估唔到無人討厭佢嘅時候，佢就走咗。」

藍潔瑛有人緣　影迷專登送飯至門口

古先生指，藍潔瑛雖然下半生潦倒，但始終曾是大明星，甚有人緣。不時有影迷專登送飯及禮物。古表示，以往曾有一名影迷專程為藍潔瑛煮飯、更送到藍潔瑛住所門口，「食完就會將碗筷放出嚟」。另外，以往亦有教會人士上門探望。

藍常到赤柱廣場麥當勞用饍　老街坊曾俾$100買嘢食

另一名女街坊則指，藍潔瑛近年似已回復正常，間中會與街坊打招呼，說聲「早晨」。而藍獨居，通常也是一個人出入，在赤柱「行得好慢，好溫柔」。藍亦經常到赤柱廣場的麥當勞用饍，「成日係老麥食嘢，好識歎」。街坊更指，有一名同住在良馬樓的婆婆，「見到佢時俾曾一百蚊佢買嘢食。」，似乎甚得老街坊歡心。女街坊表示，藍潔瑛突然倒斃家中令人惋惜，「佢咁靚女，搞到咁好可惜！」

點擊圖片：看藍潔瑛由「靚絕五台山」到潦倒一生