【獨留孖B】爸爸沉迷「食雞」忽略家庭 專家指報警治標不治本
21歲爸爸沉迷「食雞」，經常北上打機，甚至數天不回家，棄年輕妻子及半歲孖仔不顧，照顧家庭的重擔落在嫲嫲身上，令她疲憊不堪，一怒之下報警，希望兒子能好好工作，照顧家庭。「食雞」遊戲近年襲港，可以手機與其他用戶連線參與，極受青年人歡迎。有專家表示，沉迷網絡的年輕人或因透過打機獲得喜悅，以及用來逃避現實，需對症下藥，先改善與家人的關係，才可向相關機構求助，戒除機癮。
香港基督教服務處中心主任鄧震宇負責網絡沉溺輔導範疇，他表示，社會大眾一般認為沉迷打機是上癮或是一種病，「其實佢哋唔係控制唔到，只係佢哋唔選擇其他嘢，選擇咗打機」。鄧震宇指，估計事主平日生活或未能獲取意義「可能份工對佢嚟講冇乜意思，只係為咗出糧」，透過依賴打機則可得到快感，「贏到鋪機，覺得有啲嘢掌握到」。
此外，若事主同時是一名年輕父親，如在處理家事或小朋友時「搞唔掂」，或會被家人批評，導致關係轉差，「覺得同朋友打機enjoy過同屋企人相處」，故以打機逃避，將照顧家庭的責任轉嫁其他家人。鄧震宇補充，沉迷打機的年輕人，可能本身沒有發展興趣，「結果尋開心嘅嘢只有一樣，就係打機」，就該宗個案，他估計照顧小朋友對事主來說更是一項挑戰，是否能從照顧小孩中獲得快樂，亦是他會否以打機來逃避照顧家庭的重要因素。
鄧震宇認為，事主的媽媽以報警來懲戒兒子，是治標不治本的方法，「個仔可能會緊張一陣，返嚟照顧小朋友，但維持唔到幾耐」，故必須對症下藥，解決核心問題。他建議事主母親先處理與兒子的關係，「畀多啲鼓勵佢，令佢對自己有多啲認同，覺得照顧家庭係件有意義嘅事，佢先會喺打機同家庭中揀家庭」，然後才討論事主的人生安排。他又指，一般沉迷網絡的人不會主動向有關機構求助，故提議事主母親先與相關機構聯絡，協助自己改善與兒子的關係，「兩個坐低傾到偈，先有機會介紹到相關嘅服務，廿幾歲人，又做咗爸爸，佢都有尊嚴」。
《食雞》遊戲原叫《絕地求生》（簡稱PUBG）近年襲港，可以手機與其他用戶連線參與，極受歡迎。PUBG 的玩家在荒島經過一番廝殺後，贏家可見到畫面彈出「Winner Winner, Chicken Dinner」字眼，中文片版則為「大吉大利，今晚食雞」、粵語版為「贏咗今晚有雞食」，所以PUBG玩家通常會將遊戲稱為「食雞」。
「食雞」出處有三：一指2008年《鬥智21點》主角在拉斯維加斯賭場贏出後，會說「Winner winner, chicken dinner！」另一說為拉斯維加斯賭場曾有一款雞肉晚餐，售價1.79美元，而當時基本賭注為2美元，只要贏一次賭局就有足夠的錢去買一份雞肉飯填飽肚子。大蕭條時期賭徒常在小巷中賭博，但多數不會以真金白銀對賭，但如果使用真錢賭博並且獲勝時，即表示有錢在晚餐時食到雞肉。
「一晚食一次雞」
劉同學表示，已玩「食雞」遊戲兩年，「朋友開始玩，我又玩埋一份，都幾好玩」，如買了新裝備可以玩更久，並指自己「一晚食一次雞」，日花四小時「食雞」，「有朋友試過玩足12個鐘」，但他認為不應為了打機忽略照顧家庭。中六學生林小姐表示，自己玩了「食雞」約半年，有宣洩壓力功效，一星期約玩一兩天，「每次三至四個鐘，試過一齊打通宵」，最高峰「一晚食兩三隻雞」，亦從不為打機而課金，認為自己未算達沉迷程度，她聽聞昨日有年輕爸爸北上打機，棄妻兒不顧，直言「好荒謬，唔應該為咗打機唔理屋企人」。
在個多月前開始玩「食雞」的陳先生表示，認為遊戲簡單易玩，平均一晚花兩至三小時與朋友連線玩，「一晚好彩就食到兩三隻，唔好彩一隻都食唔到」，惟身邊有朋友課金買「食雞神器」，認為如果因打機而忽略照顧家庭，會立下壞榜樣，「個吸引力無大到咁」。