【廢青企管學】請成全「博炒」的人

航空公司裁員，一嘢炒600人，當中可能好多無辜打工仔好傷心，自問盡心盡力盡責求兩餐，瞓醒就無咗份工；
更甚者有人對公司唔只講金仲一直講心，被炒個感覺就好似失戀咁：「我咁愛你，點解你突然間唔要我？我究竟做錯咗啲咩？」

電視劇對白話「嫁比份工好過嫁比衰男人」，此話一出，身邊的確有幾個女強人對呢句對白表示認同（嚇親我），原來真係好多人諗住同份工一生一世，但係而家現實就立即話你知嫁比份工並唔係你諗得咁穩陣，公司同你分手真係出一封信而已，你就連私人嘢都無機會執。但係感情嘅嘢，有人愛得投入難捨難離，另一方面亦有人瀟瀟灑灑覺得天涯何處無芳草，返工態度就係「炒我丫笨」，日日遲到、得閒「病」吓、永遠怕蝕底驚做多嘢、同事有困難就企埋一邊食花生甚示踩多幾腳……偏偏呢啲「炒我丫笨」嘅人，可以寄生喺唔同公司，仲要炒極都炒唔到佢。

轉多幾份工就發現，勤勤力力同懶懶散散嘅人，好多時待遇都差唔多，好運嘅話，勤力嗰個可以每個月賺多三幾千人工，唔好運嘅話，懶懶散散嗰個仲做埋勤力嗰個人嘅上司，公平咩？痴線，你信職場上有公平架咩？當我遇到第一個懶散人而佢完全唔擔心比人炒嘅時候，我同自己講：「呢間公司唔炒人，養到啲人懶哂。佢入到呢間公司真係好彩。」轉另一份工，又遇到同一類人，我再同自己講：「佢職位低，人工平，所以公司唔炒佢，當養隻牛，佢真係好彩。」然後到第三份工又再遇到，佢仲要係經理級，好啦，原來間間公司都有「炒不到的人」，呢班人都有一堆共通點……

唔介意其他人點睇自己

做人要得到快樂，「唔介意其他人點諗自己」真係好重要，而呢樣嘢係要修練返嚟，唔係人人都做得到，簡單舉個例，你買咗件新衫，同你平時Style完全唔夾、Cutting又同你身型格格不入，但係唔買都買咗，你點都想著一次，點知著咗返工被一致劣評，同事A話：「嘩原來你手臂咁粗。」、同事B話：「你今日做咩著到成棵樹咁呀？」，聽完呢啲說話，你仲敢唔敢再著件衫返工？如果你有猶豫，即係你都介意人地點睇自己。而嗰班「炒不到的人」真係好睇得開，佢地好明白，自己日日遲到、扮病、推Job、做錯哂啲嘢、過咗Deadline都唔交嘢等等所帶比其他同事嘅痛苦，係唔會影響到自己嘅快樂。就算明知其他同事喺自己背後指指點點，但佢都係繼續懶、繼續Hea。 

我有個朋友阿強，喺一間外資公司度做，佢條Team就得三個人，經理、阿強同埋一個「炒不到的人」阿金，阿金除咗每日遲到成粒鐘之外，仲要極唔獨立。外資公司當然係每次開會都用英文，要遷就返啲外國嚟嘅老闆，但阿金本身英文奇差，每次開會都聽唔明，然後散會就旨意阿強解釋返比佢聽，阿金見有人幫自己，就越來越依賴，完全無正視自己喺公司入面嘅溝通問題、無打算去進修，Email唔識打都係叫阿強幫手，完全無羞恥之心，理直氣壯講句「我唔識」就可以唔洗做。慢慢，阿強因為要照顧埋阿金，工作量就越來越多，而阿金就好安心咁每次開會都恰眼瞓、玩電話，放工約班豬朋狗友劈酒到天光，然後又唔知醒，又遲到或者Sick Leave。我問阿強點解佢公司可以接納到呢個人？好命嘅嘢真係葡萄都無用，佢地個經理係一個善良基督徒，對於阿金嘅惡行真係原諒佢七十個七次，擔心炒咗阿金會令佢生活有困難，唯有不斷勸勸勸……期望佢有一日會浪子回頭。

而阿金呢啲人又真係可以完全無半點唔好意思、無自我檢討，亦唔介意其他人話佢蠢呀廢呀，繼而無賴落去。我諗一諗，點解有啲男人可以打女人、不停滾都娶到老婆？因為佢唔介意人地話佢賤格，加上身邊有一個不斷縱容佢嘅傻豬。

膊頭要夠A

A字膊嘅基本功當然係推Job，「炒不到的人」對於Take唔Take一個Job，並唔係睇件事值唔值得做、對公司有無效益，而係睇「邊個叫我做」，同Grade叫佢做？推；隔離Team Head叫佢做？推；自己Team Head叫佢做，而個Team Head係唔惡嘅？推。就算個Job可以為公司帶嚟100萬收入都好啦，總之乜都唔上身，佢地有個好堅定嘅心態就係「炒我丫笨」。

基本功再鍛鍊上去就係將啲Job交比其他同事，交咗出去之後，個Job就完完全全係屬於同事嘅，話之對方做到嘔白泡都絕對唔會出手幫忙。今次個苦主係做HR嘅Jennifer，佢公司每年年頭都會搞春季大旅行比同事參加，Jennifer係一個新同事，上司當然係將呢啲豬頭骨Job交比佢啦，但Jennifer入職一個月左右，都未摸清公司運作、過往活動係點，甚至連活動Budget都未知，但上司交咗比佢之後就完全唔理，個態度係「唔關我事」，彷彿成件事唔係公事而係Jennifer自己要搞生日會咁，一啲Support都無，問意見又求其交啲廢話。佢上司就係「炒不到的人」，呢類人好叻將所有交咗出去嘅公事都當係同事嘅私事，「單嘢係你嘅」、「你做死係你嘅事」，不帶一點Team Spirit。

一間公司唔炒人唔等於就係好公司，因為「對工作上心嘅人」會被嗰班「炒不到的人」搞到好痛苦，話就話做好自己本份唔洗理啲衰人，但一齊做嘢，對方工作心態唔好，會令「上心人」被連累、被影響，長此落去又點會唔心灰想辭職？結果走吓一個、走吓又一個，「炒不到的人」就長Hea因年資而升職，由害同Grade變成害下屬。呢啲人嘅衰嘢點止咁少，一齊嚟我Facebook Page分享更多。

（文章純屬作者意見，不代表香港01立場。）