【斷腳意外．有片】婆婆截肢保命留醫ICU 憶述﹕車門夾住啲衫
八旬婆婆落巴士遇意外，離奇彈飛路旁腳折斷，須截肢保命。網上今日(13日)中午流傳意外照片，相中鄧婆婆跌坐路邊坑渠蓋上，左腳踝明顯扭曲折斷，惟鄧婆婆面不改容，仍與好心人交談。《香港01》記者往探望剛完成截肢手術的鄧婆婆，她憶述稱，當時乘搭九巴在水邊村站獨自下車後，車門突關上及夾緊其衣服，婆婆即時揚聲﹕「喂!夾住我件衫!」她嘗試推開車門，詎料車門推開後，她被拋出彈飛車外，跌坐至坑渠口及受傷，車門隨即關上，九巴便駛離車站。
據鄧婆婆兒子指，九巴已派員與他聯絡，但詳細情況需待星期一員工上班，才可作出調查，他呼籲巴士司機在上落客時倍加留神，「係一件壞事嚟，唔希望再有事件發生。」
我出去買啲菜，買舊肉，買好搭車返去，落車撳鐘，撳完鐘咪落車。一落車個車門好急咁閂咗，夾住咗啲衫......我話﹕「喂!夾住我喎!」咁就推返開度門，點知一推完，架車就即刻走左啦，我就彈開咗。
85歲的鄧婆婆現時在屯門醫院深切治療部留醫，完成手術後麻醉藥力剛退，幸精神不錯，能與記者清晰對談。據了解，事發時鄧婆婆外出買餸，購物後便搭乘B1路線九巴返回水邊村的住所。
當九巴駛近元朗青山公路水邊村站時，她按下落車鐘，該站只有她下車，並無他人尾隨，「撳完鐘咪落車，一落車個車門好急咁閂咗，夾住咗啲衫，兩隻腳叉咗落地，我話﹕喂!夾住我喎!」她嘗試推開車門，車門隨即打開，卻將她猛然推開，「一開咗門就閂咗，架車就即刻走咗啦，我就彈開咗。」
鄧婆婆續指，她整個人彈飛至路邊位置，跌坐在地上，腳部也因此受傷，「架車一下彈開我去坑渠口，隻腳不知不覺就斷開咗。」問及當時有無感到痛楚，她指﹕「當時不覺得痛，唔知隻腳咁嚴重。」
我唔在場，唔敢講，但以婆婆個講法，個司機就要有責任，但係點樣就要查過先知，而家調查緊。
兒子﹕老人家捱慣 但覺得佢都辛苦
鄧婆婆斷腳後面不改容，據鄧婆婆兒子葉先生指出，老一輩年輕時鍛練多，做家庭主婦湊大子女，忍受痛楚的能力亦較強，但相信母親只是「死忍」，「佢抵得痛嘅，我覺得佢都辛苦，佢頂啫，老人家後生個陣唔係好有錢，捱慣啦，佢不嬲都唔怕痛。」他又透露，母親的腳踝傷勢太重，需要進行截肢手術，記者追問鄧婆婆是否知悉腳部已被截去時，葉未有正面回應。
子盼車長日後留意上落客情況
「九巴嗰度搵咗我，嗰啲職員，即係公關啦，就話會如實報道嘅，但啲同事星期一先返到工，到時唔知咩情形喇。」葉續指，九巴公關已與他們聯絡，惟有關員工需下周一才工作，屆時會就事件作出調查。由於他不在現場直撃事件，故不便評論責任誰屬，但若然母親的說法屬實，他稱﹕「但以婆婆講法，個司機就要有責任，但係點樣就要查過先知，而家調查緊。」葉希望日後巴士司機多加留意乘客的上落車情況，以免事件再度發生，「(事件)係一件壞事嚟，唔希望有事件再發生。」亦寄語其他駕駛人士小心交通安全。
業界﹕車閘未緊閉 巴士無法啟動
九巴員工協會副理事長郭偉光指出，車長在落客時，需透過左邊倒後鏡及車內魚眼鏡檢視落車閘門位置，當對閘門情況有所懷疑時，應擰轉頭細察情況，確保無問題後才開車。按照一般巴士的車門關閘設計，如果前後車閘由打開至完全緊閉後，錢箱會跳起，響起「啪」一聲，巴士亦可以開動；若夾到物件以致未能關上車閘，錢箱不會跳一下，巴士亦無法開動。當這種情況發生時，車長須循各方面檢查巴士，以確保無任何問題，而落車乘客已完全離開車廂後，才可開動巴士。他指出，巴士員工守則內，對每個突發情況皆有清晰指引。
他續指，巴士車閘在關上前，會響起六至八下的警告音效，任何人士，包括行動不便者或長者，若未能趕及下車時，應該立即揚聲，通知車長趕不及下車，讓車長及時知悉情況，以提供足夠時間落客。至於是次意外，由於事件仍然在調查中，郭稱難以判斷事件責任誰屬，有待九巴作進一步調查。惟他指新型巴士大多安裝了攝錄鏡頭，「U字頭」及「T字頭」的巴士更在後閘內外位置安裝鏡頭，當發生意外時，可輕易查明事件真相。