鄭松泰倒插國旗　謝偉俊堅持追究：外國用國旗整底褲玩吓係兩回事

熱血公民鄭松泰曾於議事廳內，將建制派議員檯上的國旗及區旗倒插，立法會議員謝偉俊稱將於下月立法會提動議譴責鄭松泰，或會取消鄭議員資格。謝偉俊今早（24日）接受電台訪問時指，鄭的行為公為侮辱國家，認為鄭「做錯咗就要道歉，唔好咁小學雞」。

若有關譴責議案獲在席三分之二議員通過，立法會主席須即時宣告鄭松泰喪失立法會議員資格。對於外國亦有人以國旗圖案製作日用品及飾物，包括內褲，謝偉俊指，鄭松泰的行為「同整底褲玩吓係完全兩回事」，反問「一個議會又好，一個法庭又好，可唔可以接受呢種行為呢？」

對於被問及過去非建制派均在議事廳內有不同行動反映意見，謝偉俊稱「以往隻眼開隻眼閉太寬鬆」，又舉例指即使過往違例泊車亦是「隻眼開隻眼閉」，但今個星期亦認真處理，「抄牌都抄得嚴厲啲」，故鄭松泰倒插國旗亦需接受譴責。