【妮妲襲港】強風到影響收成　本地農：可能三周無本地菜

熱帶氣旋妮妲已增強為颱風，天文台表示會在今日中午前後改掛三號強風訊號，並有機會進一步影響本港。每逢颱風接近，本地農民均受到一定影響，有農民表示擔心強風會吹倒種植棚架，造成損失之餘，農作物亦因失去保護浸壞。
元朗八鄉種植多年的農夫傅先生坦言：「都預咗可能要損失十萬八萬，但（市民）最大影響就係最多三個禮拜無本地菜食啦！」

本地農民較常種植的蔬果，大多會放到種植棚內，免被昆蟲咬穿或減低被雨水傷害，但颱風將至，狂風大雨有機會將棚架吹倒，農夫亦因此顯得份外擔心。「雖然經歷多年有心理準備，但狂風一嚟到，就算加固咗嘅棚架，都未必頂得住，菜心、白菜仔會被雨打殘晒。」

由於部份菜苗仍未成熟，不能提早收割，只能將部份將近成熟的割掉、賣走，「我哋經歷咁多，都知天大地大無得擔心，好在喺香港都復元快。」他表示菜苗最少三個星期才能收成，傅相信若受強風影響，要待新一批蔬菜成熟後，才能恢復正常供應。

天氣熱菜苗壞死

於粉嶺坪輋恐龍坑種本地有機蔬菜的農夫陳不凡則說，近日「作打風」天氣酷熱，部份只落苗數天的節瓜、蔬菜苗也抵受不住而白白「熱死」。「妮妲」將至，但可做的防禦措施卻很少，只能將部份將近成熟的瓜果預先收割，或將未成熟的入袋，減少被雨水「打傷」。

陳續說，暫時未能統計損失，但若然棚架被強風吹倒，則需要花費萬多元維修，並會影響未來一至兩個月的收成，數量至少減半。「而家打風對我哋嚟講係尷尬啲，過多一兩個星期就立秋，可能要放棄尾水（夏季最後一批種植）改種西蘭花等秋冬季植物。」另外，政府與本地農民未有緊密聯繫及通報，往往到風暴離開才知會及提供最多6千元的緊急援助金：「其實補償係好少的，因為幾千蚊只能夠購買肥料。」