【Lancôme事件】有港商罷接L'Oréal訂單撐何韻詩

法國化妝品牌Lancôme疑因內地輿論壓力，與藝人何韻詩割席。繼網民呼籲抵制Lancôme母公司L'Oreal旗下所有品牌、政黨發動遊行示威外，有在內地設廠的網台主持亦公開表示罷接L'Oreal訂單，不忿「唔擦北京鞋喺香港都搵唔到食」。

網台D100節目「風波裡的自由Phone」下午在FB發帖文，指主持傑斯稱「事件最嚴重係唔擦北京鞋喺香港都搵唔到食，而家每個香港人都要做啲嘢」，決定罷接L'Oreal產品的包裝訂單。事實上傑斯早於日前已在個人facebook公布罷接訂單決定，以示支持何韻詩，「係香港人，支持HOCC，向L'Oréal SAY NO！」傑斯表示上月才完成Lancôme訂造紙袋的訂單，又指L'Oreal訂單「大陸通街都係」。有報道指，傑斯所接的Lancôme訂單約值30萬至50萬元。